|
Köpchilikke melum
bolghinidek, 1990 – yili 4 – ayning 5 – küni Dehqanlar
qozghiliqi yüz bergen mesh’hur Barin yézisi bilen, 2007
– yili 1 – ayning 5 – küni milliy küreshchiler bilen
Xitay armiyesi otturisida keng kölemlik qoralliq
toqunush yüz bergen Kosrap yézisining her ikkisila
Qizilsu Qirghiz aptonom oblasti > qarmighidiki Aqtu
nahiyesige tewe.
Aqtu nahiyesi Sherqiy Türkistanning jenobidiki Pamir
igizlikining sherqiy qismigha, Tarim oymanliqining
gherbi qirghiqigha jaylashqan bolup, nahiyening gherbi
we gherbi jenop qisimliri Qirghizistan we Tajikistan
bilen chégrilinidu, chégra musapisi 380 kilométirdin
köpirek bolup, Sherqiy Türkistan boyiche Xitay
armiyesining konturol qilishi eng qiyin bolghan chégra
nuxtilirining biri.
Bügünki Aqtu eslide Qeshqerning Yéngisar we Qeshqer
Yéngisheher nahiyelirige tewe bolup, 1954 – yili Xitay
hakimiyiti atalmish < Qizilsu qirghiz aptonom oblasti >
ni tesis qilghanda, shu yili 8 – ayda Qeshqerning bezi
nahiyelirining yerliridin térip élip Aqtu nahiyesini
qurghan, 1956 – yili 2 – ayda Xitay hökümiti yene
Yéngisar nahiyesining Barin yézisini Aqtu nahiyesige
qoshup bergen, 1977 – yili Xitay hökümiti yene Aqtu
nahiyesini Qeshqer wilayitining bashqurushigha ayrip
bergen, 1980 – yili 7 – ayda yene bu nahiyeni Qeshqerdin
éliwélip Qizilsu oblastigha bölüp bergen.
Nöwette Aqtu nahiyeside Barin, Kosrap, Pilal … qatarliq
11 yeza, 2 bazar, 3 charwichiliq meydani, 119 kent bar
bolup, gerche bu nahiye Qizilsu Qirghiz aptonom
oblastigha qarisimu, emma Noposining mutleq köp qismi
Uyghur.
Mesilen, Xitayning resmi statiskilirida körsütülishiche,
hazir bu nahiyening omomiy noposi 167 ming 234 kishi
bolup, Uyghurlar 114 ming 417 neper, Qirghizlar 43 ming
769 neper, Xitaylar 4187 neper bolup, qalghanliri bashqa
milletlerge mensup. |
|
