|
<Amerikining muawin taşqi işlar ministiri
Lorne Corner
ependi Şerqiy Türkistanğa
ziyaretke kelgen küni, yeni 12 - ayning 18 - küni (
çarşenbe ), Şerqiy Türkistanda yéngi qurulup mehpiy
paaliyetke kirişken < Uygur Démokratik Partiyesi >
merkizi komutiti Lorne Corner ependige qarita oçuq het
élan qilip, Xitay hökümitige bolğan naraziliqini
ipadileş bilen birge, uningğa Uygur xelqining bezi arzu
isteklirini ipade qildi.
< Uygur démokratik partiyesi > ning Xitay tilida
hazirlanğan bu oçuq héti, Ürümçide mehpi tarqitildi we <
Şerqiy Türkistan informatsiyon merkizi > arqiliq çet'el
metbuatliriğa bildürüldi.
< Uygur Démokratik Partiyesi > merkizi komutiti,
Germaniyede pa'aliyet élip bériwatqan < Şerqiy Türkistan
informatsiyon merkizi > ni, bu partiyening çetellerdiki
toluq hoqoqluq bayanatçisi qiliş heqqide qarar aldi.
< Uygur Démokratik
Partiyesi > ning, Amerikining muawin taşqi işlar
ministiri Lorne Corner ependige yazğan oçuq héti
Hörmetlik Lorne
Corner ependim,
Biz barliq Uygur xelqi namidin, sizning buqétim Şerqiy
Türkistanğa qilğan ziyaritingizge bolğan
memnuniyitimizni izhar qilmaqçimiz, işinimizki, sizning
ziyaritingiz, erkin, hör we démokratik bir mohitta
yaşaşqa intiliwatqan, şundaqla insaniy heq
hoqoqlirining hem milliy mewjutluqining kapaletke ige
qilinğan asasta yaşişiğa kéçe kündüz telmüriwatqan
Uygur xelqiğe ümit we işenç élip kelgüsi !
Hörmetlik ependim, aldi bilen şuni diqqitingizğa
sunmaqçimizki, partiyemiz, birleşken döletler teşkilati
insan heqliri omomiy bayannamisining rohini özige
yetekçi idiye qilğan asasta, Şerqiy Türkistan miqyasida
kommunistik Xitay hakimiyitige qarşi mehpi paaliyet élip
bériwatqan teşkilat bolup, partiyemizning tüp meqsidi,
Şerqiy Turkistanning tel - töküs musteqilliqni qolğa
keltürüş, şundaqla, Şerqiy Türkistan xelqining erkin
dunyadiki başqa millet we xelqlerge ohşaş öz teqdirini
özi belgiligen halda azat we hör yaşaşişini emelge
aşuruştin ibaret.
Hörmetlik Lorne Corner ependim, eslide biz siz bilen
biwaste körüşüp, insaniy heq hoqoqliri éğir derijide
depsende qiliniwatqan we milliy mewjutluqi zor hewipke
duç kéliwatqan behitsiz Uygur xelqining arzu
isteklirini yetküzüşni arzu qilğan iduq, epsuski bügünki
Ürümçi ziyaritingizde Xitay hökümiti bizni siz bilen
uçruşuş imkaniyitidin mehrum qaldurdi, şunga bu oçuq
hetni yézip weten içi we sirtida élan qilişqa mejbur
bolduq, eyipke buyrimiğaysiz!
Hörmetlik Lorne Corner ependim, Şerqiy Türkistan xelqi,
qedirlik dölitingiz Amerika başçiliqidiki erkin we
démokratik ellerning yillardin buyan Xitaydiki insan
heqliri mesilisige, bolupmu Şerqiy Türkistan, Tibet
qatarliq milliy rayonlarning weziyitige yéqindin köngül
bölüp kéliwatqanliqini, şundaqla bu rayonlardiki yerlik
xelqlerning insaniy heq hoqoqlirini depsende qilmasliq
heqqide Xitay hakimiyitini izçil türde agahlandurup
kéliwatqanliqini memnuniyet we iptiharliniş tuyğusi
içide küzitip kéliwatimiz, buning üçün Amerika
başçiliqidiki erkin dunya döletliridin alahide teşkkür
eytişni bir wijdaniy burçimiz dep bilimiz.
Huddi sizgimu melum bolğinidek, nöwette Şerqiy Türkistan
rayonidiki milliy ziddiyet we ixtilaplar kişini endişige
salidiğan derijide küçeymekte, buhal, peqet Şerqiy
Türkistan rayoniningla emes, belki Ottura Asiya
rayonining muqimsizliqi üçünmu paydisiz amillarni élip
kelmekte, elwettiki, Şerqiy Türkistan rayonida buhil
muqimsizliq amillirining şekillinişi we küçüyişige
tamamen kommunist Xitay hakimiyitining bu rayondiki
yerlik xelqlerge qaratqan çékidin aşqan bésim we zulum
siyasiti biwaste sewepçi bolmaqta.
Bolupmu kéyinki 10 yil mabeynide Xitay hökümiti
Uygurlarğa qaratqan siyasi bésimini pewquladde küçeytti,
Xitay hökümiti Uygurlarğa qarita pilanliq we basquçluq
halda atsimilatsiye qilip yoqutuş siyasitini yürgüzüp
kelmekte, Uygurlarni diniy étiqatidin waz kéçişke we en
eniwiy milliy mediniyitini taşlap, Xitay mediniyitini
qobul qilişqa qistimaqta, Uygur xelqining tarihini
burmilaş bilen birge, milliy ma'arrip we mediniyet
sahéliride faşistik usollar bilen tazilaş herikiti élip
bérip, tarihiy we diniy eserlerni köydürüp yoqutuş
dolquni qözğap, ali we ottura mekteplerdiki Uygurçe
derisliklerni Xitayçilaşturuşqa we milliy oqutquçi
oquğuçilarni özlirining ana tilidin waz keçişke
qistimaqta. Xitay hökümiti Şerqiy Türkistandiki Xitay
köçmenliri arisida çong Xitayçiliq idiyesini terğip
qilip, ularni siyasi, iqtisadi, ijtimayi jehetlerde
alahide imtiyazlardin behrimen qilip, Uygur xelqiğe
bolsa ikkinçi sinip muamilisi yürgüzüp, Şerqiy Türkistan
rayonida Xitay köçmenliri bilen yerlikler otturisida
iqtisadi we başqa türlük jehetlerdiki periqlerning
küçüyüp kétişige sewepçi bolmaqta. Xitay hökümitining
bésim we zulum siyasitige qarşi çiqqan we naraziliqini
ipade qilğan Uygurlar < milliy bölgünçi >, < qanunsiz
diniy unsur >,< térorist > digendek töhmetler bilen
tutqun qilinip türmilerge taşlanmaqta yaki qanliq
şekiller bilen rehimsizlerçe basturulmaqta, bu seweptin
hazir Şerqiy Türkistanning türmiliri Uygur siyasi
mehbuslar bilen tolup taşmaqta. Kommunist Xitay
hökümitining Şerqiy Türkistanda ténçliq usoli bilen
naraziliqlirini bildürgen Uygurlarqa qaratqan qattiq
basturuş herikiti, bezi Uygur teşkilatliri we
guruppilirining qoralliq küreş yolini tallişiğa sewepçi
bolmaqta we faşistik basturuş küçeygensiri, buhil
qoralliq qarşiliq körsütüş heriketlirimu şunçe ulğuyup
barmaqta.
Hörmetlik Lorne Corner ependim, Uygur xelqi
ténçliqperwer xelqtur, Şerqiy Türkistan rayoni Xitay
kommunistliri teripidin işğal qilinğan 49 yilidin
buyan xelqimiz tarihta héç körülüp baqmiğan derijide
qattiq horluqqa we ezilişke duçar bolğan bolsimu, emma
Allah ata qilğan sewri taqetke we adletperwer erkin
dunya döletlirining meditige tayinip ümit içide süküt
bilen yaşap kelgen idi, epsuski, Xitay kommunistlirining
çekidin aşqan zulumliri, xelqimizning sewrini taşurmaqta
we türlük şekillerdiki küreşler arqiliq özlirining
naraziliqlirini bildürişige sewepçi bolmaqta, emma Uygur
xelqiğe qarita yillardin buyan dölet térorini yürgüzüp
kelgen kommunist Xitay hakimiyitining bügünki künge
kelgende < téror > ning ziyankeşlikige uçriğan döletler
qatariğa kiriwalğanliqi we heqiqi téror qurbani
hisaplanğan Uygurlarning < térorist > digen ataqqa
qalğanliqi bizni pewquladde epsuslandurmaqta.
Hörmetlik Lorne Corner ependim, şuni alahide eskertip
ötmekçimizki, yérim esirdin buyan kommunist Xitay
hakimiyitining dölet térori astida yaşawatqan bir millet
boluş süpitimiz bilen, insaniyet dunyasiğa balayi apet
élip kélidiğan her türlük térorizimğa qarşimiz we
Amerika xelqi duç kelgen < 11 sintebir > téror
weqesidin qattiq epsuslanğanliqimizni we bu weqeni peyda
qilğuçi téroristlardin nepretlengenlikimizni bildürimiz,
biz peqet Uygur xelqiningla emes, pütün Xitay
millitining, şundaqla dunya xelqlirining ténç,
démokratik bir mohit içide erkin, hör we behtiyar
yaşişini arzu qilimiz we buning üçün tirişçanliq
körsütüşke teyyarmiz, emma şu bir emiliyetki, kommunist
Xitay hökümiti < 11 sintebir > weqesini süi'istimal
qilip, Uygur xelqining erkinlik, hörlük we insançe yaşaş
hoqoqini qolğa keltürüş üçün élip bériwatqan heqqaniy
heriketlirining harektirini éğir derijide burmilimaqta
we ténçliqperwer Uygur xelqini dunya jamaetçiliki aldida
< térorist > qilip körsütüşke tirişmaqta, şuning bilen
birge yene Uygur xelqiğe qaratqan bésim we basturuş
heriketlirini téhimu küçeytmekte, bolupmu Xitay hökümiti,
birleşken döletler teşkilatining < Şerqiy Türkistan
Islamiy Herikiti > namliq teşkilat heqqide alğan
qararini özlirining faşistik qilmişlirini yoşuruştiki
közur süpitide qollunup kelmekte we bu qararni
süyistimal qilip, pütün Uygurlarğa < térorist > digen
qalpaqni keygüzüşke urunmaqta. Emma hökümitingizning
Xitay hökümitini < 11 sintebir > weqesini we birleşken
döletler teşkilatining qararini süi'istimal qilip
Uygurlarni basturmasliq heqqide Xitay hökümitini izçil
türde agahlandurup kéliwatqanliqi we janabingizning bu
qétimqi sepiringiz jeryanida Xitaydiki insan heqliri
mesilini alahide tekitligenlikingiz biz Uygurlarni
alahide hoşal qilmaqta we sizlerge bolğan
minnetdarliqimizni hessilep aşurmaqta.
Hörmetlik Lorne Corner ependim, siz hazir Şerqiy
Türkistanni ziyaret qiliwatisiz, emma siz körüwatqan
menzire peqetla Xitay hökümiti teripidin sün'i usolda
hazirlanğan Şerqiy Türkistanning taşqi körünüşidinla
ibaret, halas, eger siz Şerqiy Türkistandiki qarangğu
zindanlarda azap çékiwatqan sansizliğan Uygur siyasi
mehbuslarni ziyaret qiliş imkaniyitige érişéligen
bolsingizti, uçağda bu rayonning heqiqi qiyapitini
köreleyttingiz.
Ahirida sizning buqétim Xitayğa we Şerqiy Türkistan
rayoniğa qilğan ziyaritingizning muwapiqiyetlik boluşiğa
tilekdaşliq bildürüş bilen birge, janabingizning Xitay
rehberliri bilen ötküzidiğan söhbetliringizge, Şerqiy
Türkistan xelqining Xitayning asasiy qanunida we <
milliy teritoriyélik aptonomiye qanuni > da körsütülgen
heq hoqoqliriğa heqiqiy emel qiliş, Uygurlarning
milliy we diniy mewjutluqini yoqutuştin waz keçiş,
Uygurlarning mediniyet, ma'arip, din ... qatarliq
sahélirige qaratqan atsimilatsiye qilip yoqutuş
siyasitini tohtutuş, şundaqla Uygurlarğa qaratqan
qanunsiz tutqun qiliş, qiyin qistaqqa éliş, öltürüş
qatarliq faşistik qilmişliridin waz kéçiş heqqide Xitay
hökümitini jiddi türge agahlanduruşingizni ümit qilimiz,
şningğa işinimizki, sizning buqétimqi ziyaritingiz
Xitaydiki insan heqliri mesilisining yahşilinişi we
Şerqiy Türkistan we ottura asiya rayonining muqimliqi
üçün ijabiy rol oyniğusi !
Amerika hökümitige we sizge hörmet bildürüp:
Şerqiy Türkistan xelqi namidin:
< Uygur Démokratik Partiyesi Merkizi Komutiti >
2000 yili 12 ayning 18 küni
( Şerqiy Türkistan Ürümçi ) |
