|
Qurban Héytingizlargha Mubarek Bolsun !
Essalamueleykum Sherqiy Türkistanliq éziz yurtdashlar !
Islam alimining eng muqeddes bayramlirining biri hisaplanghan qurban héty
munasiwiti bilen barliq qérindashlirimizning bayrimini mubarekleymiz we
sizlerge janabi Allahtin salametlik, xatirjemlik, erkinlik, hurriyet we
istiqlal tileymiz !
Erkin dunya musulmanliri cheksiz söyünüsh we iptixarliq tuyghusi ichide
özlirining bu mubarek künige tentene qiliwatqan, milyomlighan insan mekke –
medinediki muqeddes tupraqlarda hej qilip, yene milyonlighan insan qurban
kesip ibadet qilip, özlirining diniy mejburiyetlirini tosalghusiz we
xatirjemlik ichide ada qiliwatqan bügünki künde, Xitay mustemlikichilirining
yawuz changgiligha we qanliq kishenlirige mehkum bolghan Sherqiy Türkistan
musulmanliri, hej qilish, qurbanliq késish uyaqta tursun, ibadet qilip
Allahqa séghinishtek eng addi diniy mejburiyetlirini ada qilishtinmu mehrum
halda xorluq ichide yashashqa mejbur bolmaqta.
Hemmige melum bolghinidek, Sherqiy Türkistan intayin mol yer asti we yer
üsti bayliqigha ige göher bir zimin, yene kélip bu rayon Xitayning nöwettiki
eng asasliq nefit, tebiygaz, kömür ishlepchiqirish bazisi bolup kelmekte.
Xitayning sanliq melumatlirida körsütülishichimu hazir Sherqiy Türkistanda
50 milyon tuyaqtin artuq charwa – mal bolup, Xitayning eng asasliq
charwichiliq bazilirining biri. Epsuski, mana shundaq bayliqqa tolghan göher
ziminning igiliri hésaplanghan milyonlighan Uyghur musulmanliri bügün
qurbanliq késish uyaqta tursun, hetta bir kilogiram gösh sétiwélishqimu
qurbi yetmey namratliq, yoqsulluq, périshanliq ichide yashashqa mejbur
bolmaqta !
Xitay hakimiyitining rehimsizlerche yürgüziwatqan dinsizlashturush siyasiti,
Sherqiy Türkistan musulmanlirining diniy mewjutluqigha we kelgüsi
istiqbaligha zor xewip we tehdit élip kelmekte.
Bügün Sherqiy Türkistanda özlirining diniy étiqat erkinlikini telep
qilishning özimu Xitay hakimiyitining neziride < chong jinayet > ke aylinip
qaldi.
Kishilik hoqoq nuhtisidin élip éytqanda, diniy étiqat erkinliki,
insanlarning eng asasliq heq – hoqoqlirining biri, shunung üchünmu,
Birleshken döletler teshkilatining pirinsiplirida we uning terkiwidiki
Döletlerning asasiy qanunlirida, insanlarning diniy étiqat erkinlikini
qoghdash we uninggha kapaletlik qilish heqqidiki maddilar, eng asasliq nizam
süpitide özining mewjutliqini saqlap kelmekte.
Dunya miqyasidin élip éytqandimu, öz puxrasining diniy étiqati bilen
hépileshken we öz xelqining diniy étiqatini chekleshke, qisishqa we
yoqutushqa urunghan héch bir mustebit, déktator hakimiyet muqim put dessep
turalighan emes, ularning aqiwiti her zaman hüsran we meghlubiyet bolup
keldi.
Erkin dunya döletliri, ichki we tashqi muqimliqni saqlashta, diniy étiqatni
cheklesh we yoqutush siyasitige emes, belki her xil dinlargha mensup
kishilerning étiqat erkinlikini yenimu kengeytish we uni qanuniy jehettin
toluq kapaletlik qilish siyasitige tayinip kelmekte.
Xiristiyan alimi dep atalghan gherip dunyasini élip éytsaq, bu téritoriyede
yashighsan héch bir insan musulman bolghini üchün hakimiyet teripidin chetke
qéqilghan yaki zerbige uchrighan emes, buyerde yashighan musulmanlarning
siyasi bésimlardin tamamen mustesna halda özining diniy paaliyetlirini dawam
qilduriwatqinini, héch bir tosalghusiz roza tutup, Qurban kesip, hej
qiliwatqanliqini körüp turiwatimiz. Gherip döletlirining herqaysi jaylirida
yengi mesjitlerning qed kötürüp chiqiwatqanliqigha shahit boluwatimiz.
Qisqisi, gherip döletliri hökümetliri bu ellerde yashawatqan musulmanlarni
tehdit emes, belki dinlar we mediniyetler otturisidiki dostluq,
hemkarliqning elchiliri dep qarimaqta. Héch bir dölet din bilen térorni,
étiqatchi xelq bilen téroristlarni bir – birige arilashturup qoyghini yoq we
diniy étiqatning terorizim bilen héch bir alaqisi yoqluqini tekitlep
kelmekte.
Emma, bügünki künde Uyghur musulmanliri béshidin kechüriwatqan pajielerge
qaraydighan bolsaq, Kommunist Xitay hakimiyitining diniy sahege qarita
dunyaning asasi éqimigha we xelqaraliq qayide – pirinsiplarning rohigha
tamamen zit we qarshi bir pozitsiye qollunup kelgenlikini we bu arqiliq
özining görini özining qéziwatqanliqini körüwélish tes emes.
Yeni Xitayning yürgüziwatqan tüp siyasiti, pütün bir Uyghur millitining
diniy étiqatini tel – töküs yoqutush siyasitidin bashqe nerse emes !
Xitay hakimiyiti hetta Uyghurlarni ishqa élish, siyasi we ijtimayi
hoqoqlardin behriman qilish jehetlerdimu dingha ishenmeslikni aldinqi shert
qilip körsütüp, < dingha ishenseng héchbir chiqish yolung bolmaydu > digen
sepsetini terghip qilmaqta. Yeni Xitay hakimiyiti teripidin 60 – we 70 –
yillarda Sherqiy Türkistanda élip bérilghan atizim, dinsizlashturush
siyasiti bügünki künge kelgende eynen köchürülüp qayta ijra qilinmaqta.
Bolupmu kéyinki 10 yilda sherqiy türkistandiki Uyghur diniy zatlarning
béshigha kelgen külpetlerni teswirlesh tolimu qiyin, bu jeryanda Xitay
hakimiyitining peqet kompartiyening teshwiqatchiliqini qilidighan az sandiki
qizil quyruq mollilarni hésapqa almighanda, heqiyqi étiqatchi diniy
zatlarning hemmisini yoqutush obikti qilghanliqini körüwélish tes emes !
Shunung üchünmu bügünki künde Sherqiy Türkistanda Xitay hakimiyitige qarshi
türlük shekildiki milliy heriketlerde diniy zatlarning aktip we yetekchi rol
oynawatqanliqi hergizmu tasadipiliq emes, din, étiqatchi bir insan üchün eng
zor meniwiy bayliq we rohiy yölenchüktin ibaret, hayatliq yollliri pütünley
késilip, béshigha éghir külpetler kelgen bir insanning eng axirida
qilidighan ishi, jeynamazda olturup janabi Allahgha nale qilip, özige sewir
– taqet we küch tileshtin ibaret, bir insan buningdinmu mehrum qaldurulghan
teqdirde, uning jandin kechip isyan bayriqi kötürüp chiqishi heyran qalarliq
ish emes !
Emma biz shununggha ishinimizki, Xitayning zulmi we mustemlikichiliki hergiz
menggülük bolmaydu, janabi Allahning himmiti we xelqimizning küchlük milliy
iradisi bilen haman bir küni wetinimiz Sherqiy Türkistanmu erkin dunya
döwletliri qataridin tegishlik yérini élip, Uyghur musulmanlirimu xuddi
erkin dunya xelqliridek özlirining héyt – bayramlirini hörlük we erkinlik
ichide qutluqlash pursitige érishidu !
Axirida, pütün wetendashlirimizning qurban héytini qayta – qayta
mubarekleymen !
Janabi Allah hemmimizge salametlik ataqilsun !
Hörmet we éhtiram bilen :
Abdujelil Qaraqash
< Sherqiy Türkistan Informatsiyon Merkizi > ning reyisi
|
