Gollandiyediki Uyghur Qérindashlar, < uygur.tv > ni Aktip Qollaydighanliqini Izhar Qilishti

Ötken hepte, bash orgini Germaniyening München shehridiki < Sherqiy Türkistan Informatsiyon Merkizi > ning reyisi, merkez qarmighidiki < uygur.tv > ning sahibi we qurghuchisi Abdujelil Qaraqash ependi, Gollandiyeda yashawatqan Sherqiy Türkistanliq qérindashlirimizdin hal sorash, ulardin ETIC ning we < uygur.tv > ning hizmetliri heqqide pikir élish meqsidide bu döwletni ziyaret qilip, Gollandiyede yashawatqan Uyghur qérindashlirimiz bilen keng dayiride körüshüp söhbetleshken idi.

Bu döwlette yashawatqan wetenperwer qérindashlirimiz birdek halda, < Sherqiy Türkistan Informatsiyon Merkizi > ning uzun yillardin buyan milliy musteqilliq herikitimizge qoshup kelgen töhpilirige yuquri baha berdi we nöwette Uyghurlarning intayin yaqturup körüshige sazawer bolup kéliwatqan < uygur.tv > ning tereqqiyati üchün maddi we meniwiy jehettin qollap – quwetleydighanliqini izhar qilishti.

Gollandiyening Uyghurlar yashawatqan herqaysi sheherliride ayrim – ayrim halda élip bérilghan söhbetlerde Gollandiyediki qérindashlirimiz < uygur.tv > heqqide nahayiti qimmetlik teklip – pikirlerni bérishti we < uygur.tv > heqqide bashlanghan iqtisadi yardem kampaniyesige aktipliq bilen ishtirak qilip, her qaysisi özlirining imkaniyetliri yar bergen asasta iqtisadi jehettin yardemde boldi.

Gollandiyede yashawatqan Uyghur qérindashlirimizning buxil yüksek derijidiki milliy mesuliyetchanliq tuyghusi we pidakarliqi Abdujelil Qaraqash ependini nahayiti memnun qildi.

Abdujelil Qariqash ependi ular bilen élip barghan söhbetliride, nöwette chetellerde élip bériwatqan milliy herikitimizning milliy rehbirimiz we meniwiy animiz Rabiye xanimning yetekchilikide zor ilgirlesh hasil qilghanliqini, Uyghur dawasining xelqaralishish qedimining kündin – künge tézlishiwatqanliqini, elwettiki buni chetellerde yashawatqan Uyghur qérindashlirimizning tirishchanliqi we pidakarliqidin ayrip qarashqa bolmaydighanliqini, wetinining musteqilliqi we öz xelqining hörlüki üchün küresh qilishning pütün Sherqiy Türkistanliq qérindashlirimizning milliy we wijdani burchi ikenlikini, shunga chetellerde yashawatqan qérindashlirimizning yüksek derijidiki siyasi mesuliyetchanliq tuyghusi bilen, Rabiye xanimning etrapigha teximu zich uyushup, siyasi teshkilatlirimizni we < uygur.tv > ni öz ichige alghan barliq teshwiqat wastilirimizni pütün küchi bilen qollishi lazimliqini eskertip ötti.

Abdujelil Qaraqash ependi yene, < uygur.tv > gha iqtisadi jehettin yardem bergen Gollandiyediki Uyghur qérindashlirimizgha bolghan minnetdarliqini bildürdi.
< Sherqiy Türkistan Informatsiyon Merkizi > teripidin bashlanghan < uygur.tv > gha yardem bérish kampaniyesi tunji bolup Gollandiyediki qérindashlirimiz arisida élip bérildi, bundin kéyin bu kampaniye chetellerde Uyghurlar yashawatqan bashqa ellerdimu qanat yaydurulidu..