|
Ürümqidiki Siyasi – Qanun Yighinida, < 3 Xil Küchler > ge Qattiq Zerbe Bérip,
Olimpikning Bixeterlikige Kapaletlik Qilish Telep Qilindi
< Tian shan tori > ning 5 – ayning 13 – küni xewer qilishiche, shu küni
Ürümqide chaqirilghan, < aptonom rayonluq jemiyet amanliqini omomlashturup
tüzesh yighini > da, olimpik mesh’ilining Sherqiy Türkistandin ötüsh
mezgilidiki bixeterlikke kapaletlik qilish, ammiwiy xarektirlik naraziliq
heriketlirining qattiq aldini élish, < milliy bölgünchiler > heqqide axbarat
– uchur toplashqa ehmiyet bérip, < 3 xil küchler > ge teximu ünümlük zerbe
bérish telep qilinghan.
< Aptonom rayonluq siyasi – qanun komutéti > teripidin chaqirilghan bu
qétimqi yighingha, < aptonom rayon > we Bing tuanning siyasi – qanun
xizmitige mesul rehberliri, shundaqla jama’et xewipsizlik tarmaqlirining
yuquri derijilik emeldarliri qatnashqan.
< Aptonom rayonluq siyasi – qanun komutéti > ning mudiri, shundaqla <
aptonom rayonluq partikom > ning dayimi hey’et ezasi Zhou Hai Lun bu qétimqi
yighinda qilghan sözide, < olimpikning amanliqini chöridigen asasta, qattiq
zerbe bérish pirinsipida ching turup, 3 xil küchlerning barliq buzghunchiliq
heriketlirige qattiq zerbe bérish lazim, axbarat we uchur toplash, analiz
qilish we höküm qilish iqtidarimizni ashurup, düshmenge qarshi küreshning
teshebbuskarliqini qolimizda mehkem tutushimiz lazim, yuquri bésim bilen
zerbe bérish, qoghlap zerbe bérish, qezip chiqip zerbe bérish, tekshürüp
zerbe bérishte ching turup, düshmenge nepes élish pursiti bermeslikimiz
lazim > dep körsetken.
Zhu hai lun der derijilik qanun tarmaqliridin, herketchan kishilerni
bashqurushni nuxtuluq ching tutup, chong kölemlik ammiwiy xarektirlik
naraziliq heriketlirining we tuyuqsiz yüz bérish ehtimali bolghan zorawanliq
heriketlirining qattiq aldini élip, olimpik mezgilidiki bixeterlikke
kapaletlik qilishni telep qilghan.
Kéyinki mezgillerdin buyan Xitay hakimiyiti, < olimpikning bixeterlikige
kapaletlik qilish > digenni bahane qilip, Sherqiy Türkistanning herqaysi
rayonlirida Uyghurlargha qarita qanunsiz tutqun qilish, nazaret qilish we
basturush heriketlirini alahide kücheytip, nechche minglighan bigunah
Uyghurni, < olimpikning bixeterlikige buzghunchiliq qilish éhtimali bar
gumanliq unsur > digen bednam bilen qolgha élip türmilerge tashlighan,
shundaqla Uyghurlarning chetelge chiqishini we döwlet ichide erkin sayahet
qilishini qattiq chekligen idi.
Yuqarqi yighinning mezmonimu, Sherqiy Türkistanning nöwettiki jiddi siyasi
weziyitini roshen ispatlap turmaqta
|
