Qaraqashliq Rehibeg Bari Xitay Metbu’atlirining Maxtishigha Sazawer Boldi

(Sürette: adem bidiki Rehibeg Bari yurtdashlirigha ichki ölkilerge berip ishlesh heqqide teshwiqat élip barmaqta)

< Tianshan tori > teripidin 4 – ayning 18 – küni élan qilinghan bir xewerde körsütülishiche, minglighan yurtdashlirini aldap Xitayning ichki ölkilirige medikarchiliqqa élip barghan Qaraqashning Kuya yézisidiki adem bidiki Rehibeg Bari hökümet tarmaqlirining alahide alqishigha sazawer bolghan.

Yuqarqi xewerde körsütülishiche, Qaraqash nahiyesining Kuya yezisidiki sodiger Rehibeg Bari hazirghiche mingdin artuq yurtdishini Xitayning Hu bei ölkisige élip berip kawapchiliqqa salghan bolup, Qaraqashliq bu Uyghur yigitlirining bezisi shu jayda Xitay qizliri bilen toy qilghan.

Qaraqash nahiyélik partikomning sekritari Wang Chang Lingning bildürishiche, Qaraqash nahiyeside atalmish < éshincha emgek küchlirini bashqa yurtlargha yüzlendürüsh > digen siyaset 2003 – yilidin étibaren yolgha qoyulghan bolup, 2007 – yiligha qeder nahiyedin bashqa yurtlargha we Xitayning ichki ölkilirige medikarliqqa yolgha sélinghan Uyghur déhqanlirining omomiy sani 100 ming adem qétimdin éship ketken.

Qaraqashliq Uyghur dehqanlirini ichki ölkilerge élip bérip kawapchiliqqa sélish ishini tunji bolup 1982 – yilidin beri Hu bei ölkiside sodigerlik qilip turiwatqan Rehibeg Bari bashlighan bolup, hazir ichki ölkilerge kawapchiliq qiliwatqan qaraqashliq déhqanlarning sani 12 minggha yétip baridu we bularning xuddi Rehibeg Barigha oxshash mexsus hojayinliri bar.

( Töwendiki süretlerde : ichki ölkilerge iwetilidighan yashlar telip – terbiye kurslirida )