< Yawropa Milliy Görüsh Teskilati > ning Mes'ulliri Merkizimizni Ziyaret Qildi

Öz xewirimiz: 4 – ayning 19 – küni chüshtin kéyin, Yawropadiki eng chong we eng nopozluq islam teshkilati hésaplanghan we dunyaning herqaysi elliride 200 mingdin artuq muntizim ezasi bar < Yawropa Milliy Görüsh Teshkilati > ning bir qisim mes'ulliridin terkip tapqan bir hey’et mexsus Germaniyening München shehrige kélip, < Sherqiy Türkistan Informatsiyon Merkizi > ning ishxanisini ziyaret qildi we merkezning reyisi Abdujélil Qaraqash ependidin, Sherqiy Türkistanning nöwettiki omomiy weziyiti heqqide tepsili melumat aldi.

Bu qetimqi hey’et, < Yawropa Milliy Görüsh Teshkilat > ning Germaniye Bawariya ölkilik bash shöbisining reyisi Abdusemet Temel, < Yawropa Milliy Görüsh Teshkilati > terkibidiki < Milliy telim – terbiye merkizi > ning reyisi Yilmaz Bölükbashi, < Yawropa Milliy Görüsh Teshkilati > Geremaniye Augusbrug shöbisi Diniy xizmetler bölümining mesuli Sadi Yaghdi qatarliqlardin terkip tapqan idi.

Ziyaret jeryanida méhmanlar, Bei jing Olimpik yighini yeqinlap kéliwatqan shu künlerde, Xitayning mustemlikisi astidiki Sherqiy Türkistan we Tibet mesilisining nöwette Dunya jama’etchilikining küchlük diqqet – étibarini qozghawatqan qiziq témilarning birige aylanghanliqini, < Yawropa Milliy Görüsh Teshkilati > ning, Sherqiy Türkistanliq qerindashlirining erkinlik we hörlük üchün élip beriwatqan milliy musteqilliq küreshlirini bashtin – axir eghishmay qet’i türde qollap – quwetlep kéliwatqan bir Türk Islam teshkilati bolush süpiti bilen, Sherqiy Türkistanning siyasi weziyitini yéqindin küzitip kéliwatqanliqini, shundaqla Uyghur qérindashlirigha bundin kéyin téximu ünümlük yardem bérishni qolgha keltürüsh üchün, pütün dunyani Sherqiy Türkistan heqqidiki yéngi uchur – melumatlar bilen teminlep kéliwatqan < Sherqiy Türkistan Informatsiyon Merkizi > ni ziyaret qilish üchün kelgenlikini bildürüshti.

Merkezning reyisi Abdujélil Qaraqash ependi aldi bilen, < Yawropa Milliy Görüsh Tshkilati > ning uzun yillardin buyan Uyghur xelqining milliy küreshlirige qiliwatqan semiymi yardemliri üchün minnetdarliq bildürüp ötkendin kéyin, ulargha Sherqiy Türkistanning siyasi, iqtisadi, ijtimayi, diniy weziyiti heqqide tepsili melumat bérip ötti.

Abdujélil Qaraqash ependi ulargha bergen doklatida, Xitay hakimiyitining, < Bei jing olimpik yighinining bixeterlikini qoghdash > digen bahane bilen, Uyghurlargha qaratqan rehimsizlerche basturush heriketlirini kündin – künge kücheytip kéliwatqanliqini, xelqara siyasi sehnilerde Uyghurlar heqqide yéngi töhmetlerni toqup chiqip, Uyghur xelqining xelqara qanun we pirinsiplarning rohigha mas halda élip bériwatqan heqqani heriketlirini qarilqshqa urunuwatqanliqini bayan qilip ötkendin kéyin, téxi yéqindila Xitay hakimiyitining Sherqiy Türkistanning Hoten wilayitide özlirining diniy étiqat erkinlikini we insani heq – hoqoqlirini telep qilghan Uyghur ayallirining ténchliq sheklidiki namayishini zorawanlarche qattiq basturghanliqini we 400 – 500 neper bigunah Uyghur ayalni qolgha élip türmige tashlighanliqini, yene shundaqla Ürümchi shehride we bashqa rayonlarda < Olimpikning bixeterlikige tehdit salghan teroristlargha zerbe bérish > digen nam bilen köpligen bigunah Uyghurlarni qolgha alghanliqini we rehimsizlerche étip öltürgenlikini eskertip ötti.

Abdujélil Qaraqaraqash ependi doklatining axirida, Uyghurlar tarixta misli körülmigen derijide qattiq bésimgha duch kéliwatqan, ularning diniy étiqati, mediniyiti, milliy ma’aripi yoqulup kétish xewipige duch kéliwatqan bügünki halqiliq peytte, Uyghur xelqining, jümlidin Sherqiy Türkistan milliy herikitining dunya jama’etchilikining we xelqaradiki dostlarning téximu jiddi yardimige muhtaj ikenlikini tekitlep ötti.

< Yawropa Milliy Görüsh Teshkilati > ning mesullirimu bu qétimqi Görüshüsh jeryanida qilghan sözliride, özliri bilen dindash we qan qérindash hésaplanghan Uyghur xelqining musteqilliq küreshlirini adaqqiche qollap – quwetleydighanliqlirini, shundaqla Yawropada yashawatqan Türk we musulman milletlirining Uyghurlargha bolghan hésdashliqini we qollishini yenimu kücheytish üchün jiddi heriket élip baridighanliqlirini bildürüshti.