|
Qaraqashliq 12 Ming Uyghur Déhqan Xitayning Ichki Ölkiliride Kawapchiliq
Qilmaqta
< Xinjiang xelq radio istansisi > ning xewiride körsütülishiche, hökümet
tarmaqlirining seperwer qilishi we bezi emgek mulazimet shirketlirining
orunlashturushi bilen, Hotenning Qaraqash nahiyesidin Xitayning Bei Jing,
Shanghai, Hu Nan, Cheng du, Wu Han qatarliq ölke we sheherlirige bérip
mexsus kawapchiliq bilen shughulliniwatqan Uyghur déhqanlirining sani 12
minggha bérip yetken.
Yuqarqi xewerde, Hu Nan ölkisige bérip kawapchiliq qilip qaytip kelgen
Tursunjan Rozi isimlik uyghur déhqanning anisi bilen köz yashliri ichide
körüshkenliki yer alghan.
Mezkur xewerde yene, 2007 – yili 10 – aygha qeder, Qaraqash nahiyesining
özidinla bashqa yurtlargha medikarchiliqqa chiqqan uyghur déhqanlirining
sanining 100 ming adem qetimgha yetkenliki, bularning xeli köp qismining
Xitayning ichki ölkilirige ishleshke barghanliqi bayan qilinghan.
Qaraqash nahiyesi, Sherqiy Türkistan boyiche eng chong we eng namrat
nahiyelerning biri bolup, noposi 400 mingdin artuq we 90 pirsentidin
köpireki uyghur, nahiye teweside 16 yeza – bazar bar.
Qaraqash nahiyesi tarixtin buyan milliy inqilaplar eng köp yüzbergen
nahiyelerning biri bolghini üchün, Xitay hakimiyiti Hotende mexsus < Bing
tuan déhqanchiliq meydanini bashqurush idarisi > ni qurup, Bing tuanning
toluq qorallanghan 47 – polkini Qaraqash nahiyesige orunlashturghan we bu
poloktiki Xitaylarning sani resmiy istatiskilarda 5000 din ashidu,
nahiyening asasliq su menbeliri we munbet térilghu yerliri mana bu 47 –
polik teripidin igelliwelinghan.
Hotendiki Uyghur déhqanlirining yilliq kishi béshigha toghra kelidighan
otturiche kirimi hökümetning resmiy sanliq melumatlirida 1300 yuandin artuq
dep körsütülgen bolsimu, emma qaraqashliq déhqanlarning kirimi 1000 yuangimu
barmaydu.
Bu nahiyediki uyghurlarning beshte bir qismining öz makanini tashlap bashqa
yurtlargha tirikchilik yoli izdep chiqqanliqining özila, Qarashashliq Uyghur
déhqanlirining nöwettiki echinishliq halitini toluq körsütüp turmaqta.
|
