Yéngiyer Yézisidiki Besh Aka - Uka Qérindashlarning Qorosidin Qoral tépilghan

[2008.04.03 RFA] 4 - ayning 2 - küni, "New York waqit géziti" Uyghur éli weziyiti toghrisida bergen mexsus xewiridiki sürette, xitay saqchilirigha tolghan qeshqer kochisining körünüshi. AFP Photo

Aldinqi küni radiomizgha kelgen bir inkasta, ghulja shehirining yéngiyer yézisida saqchilarning jiddiy xaraktérlik öy axturush élip barghanliqini, axturushta, saqchilarning topa türtüsh mashinisi bilen töt oyni örüp, métal tekshürüsh apparatliri bilen tekshürüsh élip barghanliqini buning bilen teng keng kölemlik tutqun qilish bashlanghanliqini bildürgen idi. Biz ikki kündin buyan weqege alaqidar orunlardin melumat igiliduq. Netijiside, bu yil 3 ‏ - ayning 28 ‏ - küni, saqchilarning yéngiyer yézisida ikki chong herket élip barghanliqi ashkarilandi.

" Herket mexpiy hem sezgür"

Mesul xadimlarning bildürüshiche, bu ikki heriketning biri qoral yoshurulghan dep qaralghan aka - uka qérindashlarning qoru - jaylirini axturush herikiti؛ yene biri qanunsiz meshrep uyushturghan dep qaralghan 25 neper yashni qolgha élish herikiti. Biz heriketni ijra qilghan yéngiyer yéziliq saqchi ponkitigha téléfon qilghinimizda, ponkit bashlighi herket élip bérilghanliqini étirap qildi, emma tepsiliy melumatni yuqiri rehberlik ornining ruxsiti bolmay turup ashkariliyalmaydighanliqini bildürdi.

Ghulja sheherlik saqchi idarisining bir mesul xadimi, bu heriketning nahayiti mexpiy, jiddiy we sezgür herket ikenlikini, bildürdi. U yene, bu heriketning aptonom rayonluq saqchi nazaritining qomandanliqida élip bérilghanliqini, ürümchi sheherlik saqchi idarisiningmu weqedin xewerdar ikenlikini, shunga weqe heqqide melumat bérelmeydighanliqini bildürdi.

" Wang léchüen bizge undaq démeydu"

Uyghur rayonining partkom sékritari wang léchüen ötken heptidiki bir bayanida, rayondiki teshwiqat sépini Uyghur rayonining heqiqiy ehwalini xewer qilishqa chaqirghan idi. Yuqiriqi mesul xadim, wang léchüenning bu sözlirining peqet sirtqa qarita bir teshwiqat ikenlikini, emeliyette élip bérilghan heriketlerning heqiqiy ehwalidin saqchilarning öziningmu xewersiz ikenlikini ashkarilidi. Ghulja sheherlik teshwiqat idarisigha téléfon qilghinimizda, bir xadim weqedin teshwiqat bölümining xewerdar ikenlikini bildürdi.

Yéngiyer yéziliq hökümetning bir kadiri, 3 ‏ - ayning 28 ‏ - küni saqchilar öy axturup qoral tekshürüsh élip barghandin kéyin, yéziliq hökümet kadirlirigha yighin échilip ehwaldin qisqiche melumat bérilgenlikini bildürdi.

Mesul xadim: " öy örülgenliki yalghan"

Sheherlik partkomning teshwiqatqa mesul bir rehbiri, neq meydandin yeni yéngiyer yézisida xizmet ishlewatqan meydanida turup melumat berdi. Uning bildürüshiche, qoral axturush bilen, qanunsiz meshrep uyushturghuchilarni tutush bir - Birige munasiwetsiz ikki herket؛ qoral axturush yéngiyer yézisining yéngiyer kentide élip bérilghan, qanunsiz meshrep uyushturghuchilarni tutush, yéngiyer yézisining almutiyar kentide élip bérilghan.

Uning bildürüshiche, meshrep ezaliridin qolgha élinghanlarning sani 25, qoru - Jayidin qoral tépilghan besh aka - ukining birining ismi abduréhim. Yene bir yéza kadirining ashkarilishiche qolgha élinghanlarning birining ismi eli qunaxun. Yuqurqi mesul xadim, qoral axturush jeryanida, öylerning traktor bilen örüwétilgenlikini inkar qildi. Emma, u bildürgen besh aka - ukining qoru - jayini axturghanliq heqqidiki melumat bizge kelgen inkastiki 4 qoru - jay örülüp axturulghanliqi heqqidiki melumatni san jehettin asasen toghriliqni ispatlidi.

Muqimliq tarixtiki eng yaxshi basquchtimu?

Bu qétim yéngi yer yézisida élip bérilghan öy axturush we adem tutush herkitini bezi inkaschilar, bu yil ürümchi shehirining bext yoli rayonida yüz bergen 27 ‏ - yanwar toqunushigha alaqidar herket dep qarisa, yene bir inkaschi, 1997 ‏ - yildiki 5 ‏ - féwral weqesining yoshurunup yürgen bir yétekchisini qolgha chüshürüsh bilen munasiwetlik dep bildürmekte. Besh aka - ukilar qorosidin tépilghan qoralning tipi sani hazirghiche éniq emes. Bir yéza kadirining bildürishiche tépilghan qoral tipi partlatquch dora.

Uyghur rayonining jamaet xewpsizlik nazariti aldinqi heptidiki bayanatida, Uyghur élining muqimliq jehettin tarixtiki eng yaxshi basquchta turiwatqanliqini bayan qilghan idi. Yuqirida igelligen melumatlirimiz, nazir ependining dégenlirining tetürini eks ettürmekte.
(Shöhret Hoshur)