|
Germaniyede Uyghur we Tibetler Birleshme Namayish Ötküzdi
Sherqiy Türkistan milliy herikitining rehbiri, Uyghurlarning meniwiy anisi,
shundaqla < Dunya Uyghur Qurultiyi > ning reyisi Rabiye Qadir xanimning
chaqiriqigha asasen, Dunyaning herqaysi jayliridiki Uyghur teshkilatliri
türlük shekildiki naraziliq paaliyetlirini uyushturush arqiliq, Kommunist
Xitay hakimiyitining nöwette Tibette élip bériwatqan qanliq basturushini
eyiplep, özliri bilen teqdirdash bolghan Tibet xelqighe bolghan qollishini
bildürüp kelmekte.
 Shu
qatarda bügün, yeni, 3 – ayning 18 – küni, Germaniyening München shehride
Qurultay qarmighidiki < Yawropa Sherqiy Türkistan Birliki > teshkilati bilen
Tibet teshkilatliri birlikte Xitaygha qarshi birleshme namayish ötküzdi.
Eslide Münchendiki Xitay konsulxanisining aldida ötküzülishi pilanlanghan bu
qetimqi namayish, tünögün kechte konsulxa aldida yüzbergen bezi weqeler
tüpeylidin, konsulxanigha birqanche yüz metir yiraqliqtiki Roman Plats
meydanida élip bérildi.
 Germaniye
metbuatlirining xewiride körsütülishiche, tünögün kechte bir gurup Tibetlik
Münchendiki Xitay konsulxanisigha basturup bérip, konsulxanining ishik –
derizilirige we tamlirigha boyaq bilen, < Xitaylar Tibettin yoqalsun >, <
Xitayning Tibette élip bériwatqan qanliq qirghinchiliqini qattiq eyipleymiz
> digendek mezmonlardiki shoarlarni yezip toshquziwetken. Weqe jeryanida
bezi Tibetlikler qolgha élinghan. Bu seweptin Saqchi dayirliri bügünki
namayishni Konsulxana aldida ötküzüshke yol qoymighan.
 Germaniye
waqti etigen saet 9 da bashlanghan bu qetimqi birleshme namayishta,
Tibetlikler, Kishilik hoqoq teshkilatlirining ezaliri bilen birge yene
München Shehride yashawatqan köp sandiki Uyghur kélip qatnashti.
Namayish, Germaniye metbuatliriningmu alahide qiziqishini qozghighan bolup,
meydanda ziyaretke kelgen muxpirlarning sanimu nahayiti köp idi.
 <
Dunya Uyghur Qurultiyi > ijrahiye komutetining wakaletchi reyisi Enwerjan, <
Dunya Uyghur Qurultiyi > ning bash katibi we Qurultay qarmighidiki < Yawropa
Sherqiy Türkistan Birliki > teshkilatining reyisi Dolqun Eysa we < Yawropa
Uyghur Tetqiqat Merkizi > ning reyisi Ümit Agahi qatarliqlar namayish
jeryanida muxpirlarning ziyaritini qobul qilip qilghan sözliride, Uyghur
xelqi bilen teqdirdash bolghan Tibet xelqining milliy heriketlirini qollap –
quwetleydighanliqini, shundaqla Xitay hakimiyitining nöwette Tibet xelqighe
qarita élip bériwatqan qanliq qirghinchiliqini qattiq eyipleydighanliqini
bildürüshti.
Uyghur namayishchilar qollirida Xitayning Tibettiki qirghinchiliqi
eyiplengen sho’arlar chüshürülgen lozunkilarni, Sherqiy Türkistanning ay –
yultuzluq kök bayriqini, shundaqla Bei jing olimpik yighinigha naraziliq
bildürülgen taxtilarni kötergen bolup, chetel metbu’atlirining alahide
diqqet – etiwarini qozghidi.
Germaniyediki bezi Radio istansisiliri namayishni neq meydandin xewer
qilishti.
Sherqiy Türkistan milliy herikitining rehbiri, Uyghurlarning meniwiy anisi,
shundaqla < Dunya Uyghur Qurultiyi > ning reyisi Rabiye Qadir xanim, Xitay
hakimiyitining nöwette Tibette élip bériwatqan qanliq basturush herikiti
munasiwiti bilen elan qilghan bayanatida mundaq dep körsetti:
<
Dunya Uyghur Qurultiyi Sherqiy Turkistan xelqige wakaliten, Xitay
hokumititining Tibettiki qanliq qirghinchiliqini shiddet bilen eyiplesh
bilen birge, Tibet xelqining heqqani kürshini qollaydighanliqimizni, ular
bilen birsepte ikenligimizni jakalaymiz. Bu munasiwet bilen Dunya Uyghur
Qurultiyi pütün Sherqiy Turkistan Teshkilatlirini, wetenperwerlirini özliri
turushluq döletlerdiki Tibet teshkilatliri bilen alaqe baghlap, Tibet
herikitige ilham bérish we qollash paaliyitini yolgha qoyushni teshebbus
qilimiz. Dunyaning herqaysi jaylirida Tibet uchun élip bérilwatqan narazliq
namayishlirigha, her qaysi doletlerdiki Sherqiy Turkistan teshkilatlirining
jiddi awaz qoshup, Uyghur milliy hérikitining tesir küchini namayen qilishqa
tegishlik töhpe qoshushini ümid qilimiz >.
Bu qetimqi namayishning neqmeydan körünüshlirini < uygur.tv > ning
purogrammisidin toluq köreleysiz.
|
