ETIC Bayanati:
Xitay Hakimiyiti Olimpik Yighinini Milliy Herikitimizni Qarilashning Siyasi Wastisigha Aylanduriwaldi

Nöwette chetellerdiki Uyghur teshkilatliri, 2008 – yilliq olimpik yighinining Bei Jingda ötküzülishige qarshi aktip türde heriket qilip kelmekte, Uyghurning buxil naraziliqliri, özliri turiwatqan döwletlerning qanunliri yol qoyghan dayiride, shundaqla Xelqaraliq qanun – tüzüm we pirinsiplarning rohigha emel qilinghan asasta tenichliq shekli bilen élip bérilmaqta.

Yene kélip bügün olimpikning Xitayda ötküzülishige qarshi turiwatqanlar peqet Uyghurlarla emes, demokratik ellerning parlamentliri, Xelqaraliq kishilik hoqoq teshkilatliri, chetellerdiki Xitay demokratliri, Tibetlikler, Taiwanlikler, shundaqlar démokratiye we kishilik hoqoqni yaqlighuchi milyonlighan insanlardin ibaret.

Chünki ular, dunya tenichliqining, birlikning, ittipaqliqning, insanlar otturisidiki mehri – muhabbet we dostluqning simowuli hisaplanghan Olimpik yighinining, bu pirinsiplarni ayaq asti qiliwatqan Kommunist Xitay döwlitide ötküzülishining insaniyet dunyasi üchün éghir haqaret we nomus ikenlikini tekitlep kelmekte.

Dunya jamaetchilikining qattiq besimi we naraziliqigha qarimastin, 2008 – yilliq olimpik yighinining Bei Jingda ötküzülidighanliqi qarar qilinghan shunche uzun mezgildin buyan Kommunist Xitay hakimiyiti Kishilik hoqoq jehette hech bir ilgirlesh hasil qilghini yoq, eksiche mustemlikisi astidiki Uyghur, Tibet qatarliq milletlerge qaratqan rehimsizlerche qanliq basturush, talan – taraj qilish, Xitaylashturush siyasitini kündin – künge chongqurlashturup kelmekte.

Elwettiki Xitay hakimiyitining buxil gheyri insani siyasiti, Sherqiy Türkistanda Uyghur xelqining Xitay hakimiyitige qarshi élip bériwatqan milliy heriketlirining yenimu küchüyishige sewepchi bolmaqta.

Emma, kommunist Xitay hakimiyiti keyinki mezgillerdin buyan özlirining Uyghur xelqighe qarita yürgüziwatqan jinayi qilmishlirini yoshurush üchün, milliy herikitimizning meqsidi, xarektiri we shekli eghir derijide burmilanghan bir qatar süni hadisilerni toqup chiqip, bu arqiliq Uyghurlarning 100 yillardin buyan élip bériwatqan heqqani milliy heriketlirini qarilashqa we dunya jamaetchilikining közini buyashqa urunup kelmekte.

Bunung ipadiliri shuki, yeqinda Xitay metbuatlirida, 1 – ayning 27 – küni Sherqiy Türkistanning paytexti Ürümqide bir türküm atalmish < terorist > larning etip öltürülgenliki we qolgha chüshürülgenliki, ularning yenidin zor miqdarda oq – dora we partilatquch buyumning bayqalghanliqi, bularning Bei Jingdiki olimpik yighinighini mezgilide < terorluq > herikiti élip bérishni pilanlighanliqi bayan qilindi.

Yeqinda yene Xitay metbuatlirida, < Uyghur terorist > larning 3 – ayning 7 – küni Ürümqidin Bei Jinggha üchqan bir yoluchilar ayrupilanini partilitishqa urunghanliqi, bunungmu Olimpik yighinigha qarshi élip bérilghan bir qetimliq < terorluq herikiti > ikenliki bayan qilindi.
Emma Xitay hakimiyiti hazirgha qeder yuqarqi ikki weqe heqqqide dunya jamaetchilikini qayil qilalighudek héch bir délil – ispatni otturigha qoyalighini yoq !

Shuni alahide eskertip ötmekchimizki, hazirgha qeder meyli weten sirtida, yaki weten ichide bolsun, héch bir Uyghur teshkilati Bei Jing olimpik yighinining bixeterlikige tehdit salidighan heriket hem pilanda bolghini yoq we esla bolmaydu !

Uyghurlarning milliy heriketlirini Olimpik yighinining bixeterlik mesilisi bilen baghlap qarash, mahiyette Uyghurlargha qilinghan eng zor haqarettin ibaret ! chünki Uyghur xelqi öz putigha palta chapidighan axmaqlardin emes !

Dunya jamaetchilikining hésdashliqini we qollishini qolgha keltürüsh bolsa, Sherqiy Türkistan milliy herikitining birdin – bir nishani we tüp pirinsipidin ibaret, ehwal shundaq iken, Uyghurlarni dunya jamaetchilikining ortaq merikisige aylanghan Olimpik yighinining bixeterlikige tehdit séliwatqan amil dep qarash bolsa nomussizlarche otturigha qoyulghan zor siyasi töhmet bolupla qalmastin, nahayiti külkilik we bimene qarashtin ibaret !

Kommunist Xitay hakimiyiti eyni chaghda Amerikida yüzbergen < 11 – sintebir > weqesini süyistimal qilip, xelqara siyasi sehnilerde Uyghurlarning milliy herikitini qarilashqa urunghan we meqsidige yetelmigen idi, mana hazir bolsa Olimpik yighinini süyistimal qilip, yene nomussizlarche Uyghurlarning milliy heriketlirini qarilashqa urunup kelmekte, emma parasetlik xelqimiz we jesur küreshchilirimiz Xitayning bu yirginishlik toziqigha hergiz chüshmeydu !

Yene shuni eskertip ötmekchimizki, Uyghurlarning milliy herikiti bir – ikki künde peyda bolup qalghini yoq, Sherqiy Türkistan mustemlikige duchar bolghan 100 yillardin buyan Xelqimiz Xitay mustemlikichilirige qarshi türlük shekiller bilen küresh qilip kelmekte, bu uzaq tarixiy jeryanda milliy küresh sepimiz dunya jamaetchilikining bixeterlikige ziyan salidighan birmu herikette bolghini yoq we bu jehette dunyagha örnek bolup kelmekte, dimek, Kommunist Xitay hakimiyiti teripidin otturigha qoyulghan yuqarqidek sepsetiler bolsa meqsetlik halda oydurup chiqirilghan siyasi toqulmidin bashqa nerse emes !

Biz, Xitay hakimiyitining bu yirginishlik tohmitini qattiq eyiplesh bilen birge, dunya jamaetchilikini kommunist Xitayning buxil siyasi neyrengwazliqidin hushyar bolushqa chaqirimiz !

Abdujélil Qaraqash

< Sherqiy Türkistan Informatsiyon Merkizi > ning reyisi