Bing Tuande Yéngi Sheherler Berpa Qilinmaqchi

( Yuqarqi Sürette: Bing tuaning bayanatchisi axbarat élan qilish yighinida )

< Tian shan tori > ning 2 – ayning 29 – küni xewer qilishiche, Sherqiy Türkistan Xelqi teripidin < Jallat qoshun > dep atalghan Bing tuande 2020 – yiligha qeder yene yéngidin 3 – 5 chong sheher berpa qilinidiken.

Hazir Bing tuan qarmiqida Xihenze, Alar, Tumshuq, Wu jia qü qatarliq 4 chong sheher bolup, 2020 – yiligha barghanda Xitayning uwisi hésaplanghan Xihenze shehrining noposi yerim milyondin köpirekke, Alar, Tumshuq we Wu jia qü shehrlirining noposimu 200 mingdin köpirekke yetküzilidiken, hazir Bing tuan qarmighidiki 175 tuan – meydanning hemmisila bazarliship bolghan bolup, Bing tuanning bazarlishish nisbiti 70 pirsenttin ashqan.

Nöwette Bing tuan qarmighidiki herqaysi Dewiziyelerning merkezliri asasiy jehettin yerliktiki sheherlerde bolup, mesilen, yéza igilik 4 – dewiziyesining merkizi Ghuljida, 1 – dewiziyesining Aqsuda, hazir bolsa Bing tuan öz aldigha merkizi sheherlerni berpa qilip, herqaysi Dewiziyelirining qomandanliq shitaplirini shu sheherlerge yötkeshke hazirlanmaqta.

Sherqiy Türkistanda 1954 – yilidin buyan öz aldigha musteqil xandanliq quruwelip, yerlik xelqqe qilmighan eskilikliri qalmighan Bing tuanning bügünki künde Sherqiy Türkistanda öz aldigha chong sheherlerni berpa qilishqa bashlighanliqi, Xitay merkizi hökümitining Bing tuanni emeldin qaldurush uyaqta tursun, eksiche uni téximu kücheytip, téritoriyésini üzlüksiz kéngeytidighanliqini ispatlap turmaqta...