Sherqiy Türkistanning Jenobida 170 Mingdin Artuq Kishi Qar Apitining Ziyinigha Uchridi

Ötken bir yilda, Sherqiy Türkistanning Uyghurlar zich olturaqlashqan jenobi rayonlirida éghir derijide qurghaqchiliq we kelkün apetliri yüz bérip, milyonlighan Uyghur déhqanliri iqtisadi jehette éghir weyranchiliqqa uchrighan, Xitay hakimiyiti buni purset bilip, < éshincha emgek küchlirini bashqa yurtlargha bérip ishleshke seperwer qilish > digen bahane bilen, apet rayonliridiki milyonlighan Uyghur déhqanlirini bashqa yurtlargha, hetta Xitayning ichki ölkilirige sürgün qilghan idi.

Xewerlerge qarighanda yéqinqi künlerdin buyanmu Jenobi rayonlarda éghir derijide qar apiti yüz bérip, yerlik déhqan – charwichilar éghir ehwalda qalghan.
< Tianshan tori > ning 1 – ayning 29 – künidiki xewiride körsütülishiche, 1 – ayning 12 – künidin hazirgha qeder, Qeshqer, Atush, Hoten we Aqsu wilayetliride qattiq qar yeghip, qarning qélinliqi 20 – 30 santimétirgha yetken, bügünge qeder qar sewebidin 577 éghiz olturaq öy örülüp chüshken, 8056 éghiz öyning torusi buzulghan, 40 ming tuyaqtin artuq charwa – mal tonglap ölgen.

Qar apitining ziyinigha uchrighanlarning sani 176 ming 900 neperge, biwaste iqtisadi ziyan 31 milyon yuandin köpirekke yetken.