Yawrupa Sherqiy Türkistan Birliki Teshkilatining 16 - nöwetlik saylimi ghelibilik ötküzildi

Bash shitabi Gérmaniyining München shehride bolghan "Yawrupa Sherqiy Türkistan Birliki" teshkilatining 16 - nöwetlik saylimi 2008 - yili 1 - ayning 13 - küni Münchendiki her sahe teshkilatlar birlikining paaliyet merkizi bolghan "Bir Dunya Öyi" de töt saet dawam qilip, ghelibilik axirlashti. saylamgha München shehridiki barliq uyghurlar toluq qatnashqandin sirt, etrap rayunlardiki we bashqa shehrlerdiki uyghurlarmu kélip qatnashti. 150din artuq uyghur jamaiti ishtirak qilghan bu saylamning, eng medeniy, eng démokratik, eng keskin bir saylam bolghanliqini hemme birdek testiqlashti.

Saylamdin ilgiri, Yawrupa Sherqiy Türkistan Birliki teshkilatining sabiq reisi Dolqun Eysa ependi, 2006 - yilidin 2008 - yilighiche bolghan ikki yil mabeynide mezkur teshkilatning qolgha keltürgen netijiliri heqqide etrapliq doklat bérip ötkendin kiyin, Teshkilatning maliye ishliri mesuli Ümut Tursun ependi ikki yilliq maliye dokilatini uqup ötti. andin saylamgha rehberlik qilish goruppisi qurup chiqildi. jamaetning qol kötürüp awaz bérishi bilen Dunya Uyghur Qurultiyining muawin reisi Esqerjan, Dunya Uyghur Qurultiyi Ichkiy ishlar komitétining mudiri Abdujélil Emet we uyghur senetkari Merwayit Hapiz xanimlar bu goruppigha saylandi.

Yawrupa Sherqiy Turkistan Birligi, 17 yildin artuq siyasiy tarixqa ige bolup Sherqiy Türkistan ( Uyghuristan) milliy Qurultiyi, Dunya Uyghur Yashliri Qurultiyi we bügünki Dunya Uyghur Qurultiyining dunygha kélishige zor hesse qoshqan mezkur teshkilatning bu qétimqi saylimigha Yawrupa Sherqiy Türkistan Birliki teshkilatining aldinqi reisi, Dunya Uyghur Qurultiyi ning Bash katipi Dolqun Eysa ependi bilen, sabiq Sherqiy Türkistan ( Uyghuristan) milliy Qurultiyining reis, Dunya Uyghur Qurultiyi Ijraiye komitétining wakaletchi reisi Enwerjan ependiler özlirini namzat qilip körsetti.

Melumki, bu ikki küchlük namzat saylamdin ilgiri uyghur jamaitining qollishini qolgha keltürüsh üchün paal heriketler qollunup, öz terepdarlirining sanini arturush arqiliq, saylamda ghelibe qilishqa térishqan idi. bu qétimqi saylam keskin tüs aldi we qoyuq riqabet keypiyati hasil qildi. uyghur jamaitimu jiddiy muamilide bolup, öz nishanining ghelibisige tilekdash bolushti.

Saylam resmi bashlinishtin ilgiri, Dolqun Eysa ependi we Enwerjan ependiler, eger bu qétimqi saylamda ghelibe qilip, Yawrupa Sherqiy Türkistan Birliki teshkilatigha reis bolghan teqdirde, nime yéngiliqlarni yaritidighanliqi we qandaq Pilan-Programmilarni emelge ashuridighanliqi toghrisida nutuqlar sözlep, öz terepdarlirining könglini utushqa térishti. otturigha qoyulghan yéngidin yéngi layihiler jamaetning alqishlirigha érishti.

Saylam Démokratik pirinsiplargha toluq emel qilish yüzsidin, yoshurun awaz bérip, saylam sanduqigha chek tashlash sheklide élip bérildi. 150din artuq jamaetning 149 nepiri bu qétimqi saylamgha awaz qatnashturdi. saylam netijisi élan qilinishtin ilgiri, uyghur jamaiti bir muddet hayajanliq minutlarni bashtin kechürdi. netije élan qilinghanda bolsa, kishiler orunliridin turushup, uzunghiche güldiras alqish sadaliri yangratti. bir birlirini tebrikleshti, chuqanlar sélishti we yéngi reiske gül destiler teqdim qildi.

Bu qétimqi saylamda Yawrupa Sherqiy Türkistan Birliki teshkilatining sabiq reisi, Dunya Uyghur Qurultiyining bash katipi Dolqun Eysa ependi 59 awazgha qarshi 88 awaz bilen, Yawrupa Sherqiy Türkistan Birliki teshkilatining yene bir qétimliq reislikige saylandi.

Mezkur teshkilatning reislikige saylanghan Dolqun Eysa ependi qisqiche ipade bildürüp, özini saylighan we saylimighan barliq qérindashlirini baghrigha basidighanliqini, teshkilatning bashqa hey`etliri bilen mürini mürige tirep küresh qilip, jamaetning arzu - ümidlirining höddisidin chiqish üchün chamining yétishiche térishchanliq körsitidighanliqigha wede berdi.

Reislik saylimi axirlashqandin kéyin, teshkilatning Muawin reisliri, bash katipi, Maliye mudiri, diniy ishlar bölümi mudiri, ayallar bölümi mudiri we yashlar bölümi mudirliridin ibaret 9 kishilik hey`et qol kötürüp awaz bérish sheklide saylap chiqildi.

Enwerjan ependi we Tursun Muhemmed ependiler Yawrupa Sherqiy Türkistan Birliki teshkilatining Muawin reislikige, Erkin Zunun ependi yene bir qétim teshkilatning bash katipliqigha, Fondi mes`ulluqigha Gülnar Osman xanim, Diniy ishlar bölümi mudirliqigha Memtimin Qarim, Teptishlike Abdusalam ependi, Ayallar bölümi mes`ulluqigha Rahile Osman xanim, yashlar bölümi mes`ulluqigha Abduleziz Ahmed ependiler saylandi.

Bu qétimqi saylam uyghur jamaitini köp memnun qildi. Saylam intayin adil we demokiratik pirinsiplargha toluq emel qilghan asasta elip berildi.

Yawrupa Sherqiy Turkistan Birligi

2008 - yili 1 - ayning 13 - küni.