|
Sherqiy Türkistangha Ikki Hepte Ichide 100 ming Xitay Yötkep Kélinidu
< Tianshan tori > da 8 – ayning 22 – küni elan qilinghan bir xewerde
körsütülishiche, 9 – ayning 5 – künige qeder Xitayning Chungqing rayonidin
100 ming Xitay Sherqiy Türkistangha yötkep kélinip, Bingtüenning paxta
yighiwélish ishlirigha sélinidiken.
1626 neper Xitayni basqan tunji poyiz 8 – ayning 21 – küni Ürümchige yétip
kelgen we bu Xitaylar bingtüenning 6 – we 8 – dewiziyeliridiki tüen –
meydanlargha paxta terishqa teqsim qilinghan.
Xewerde körsütülishiche, bu Xitaylarning hemmisila Chungqingning buyil 7 –
ayda apetke uchrighan Yongquen, Dongliang,Wulong rayonliridin yötkep
kélingen bolup, bularning hemmisila Sherqiy Türkistangha tunji kélishi iken.
9 – ayning 5 – künige qeder 17 qétimliq mexsus poyiz qatnishi arqiliq 100
ming Xitay yötkep kélinidiken.
Sherqiy türkistandiki atalmish < ishlepchiqirish qurulush bingtüeni > ning
buyilliq kiwez terilghu kölümi 7 milyon 70 ming mo bolup, paxta terishqa
özlirining Xitayliri yétishmigini üchün, Chungqing shehrining apetke
uchrighan rayonliridin 100 ming Xitayni yötkep kélishni qarar qilghan.
Bingtüen bu Xitaylarning her biri üchün ayda 2000 yüen maash öteydiken.
Bingtüenning bu qétimqi Xitay yötkesh herikiti, tarixta misli körülüp
baqmighan bir qétimliq eng zor adem yötkesh herikiti bolghini üchün, yerlik
xelq arisida qattiq ensizlik peyda qilmaqta, gerche Bingtüen terep bu
Xitaylarni peqet ikki ayliq paxta yighiwélish ishigha sélish üchün yötkep
kelgenlikini bayan qilghan bolsimu, emma yerlik xelq bu Xitaylarning köp
qisminingmu xuddi ilgiri kelgen Xitaylargha oxshash sherqiy türkistangha
yerliship qalidighanliqini texmin qilishmaqta.
< Tianshan tori > ning ötkende bergen bir xewiridimu, bingtüenning kelgüsi
30 yil ichide omomi noposini 7 milyongha yetküzüshni pilanlawatqanliqi xewer
qilinghan idi.
Hökümet terepning resmiy statiskilirida Bingtüenning hazirqi noposi 3
milyongha yeqin.
|
