Xitay Hökümiti Chetellerde Sherqiy Türkistan Mesilisi Heqqide Keng – Kölemde Teshwiqat Élip Berishqa Hazirlanmaqta

Xitay merkizi hökümitining orunlashturushi bilen, Xitayning chet'eldiki 30 döwlette turushluq elchixanisining asasliq xadimliridin terkip tapqan 53 kishilik tekshürüsh ömigi Sherqiy Türkistangha kelgen we bu ömek 8 – ayning 15 – künige qeder Sherqiy Türkistanning pütün rayonlirini kézip tekshürüsh élip barghan idi.

Chet'ellerdiki Uyghur teshkilatliri Xitay hökümitining bu xerikitini, < Xitay hökümiti chet'ellerde Uyghurlarning milliy herikitige qarshi yene bir qetim omomiy yüzlük qarilash herikiti élip baridighanliqining aldin bishariti > dep qarimaqta we bununggha qarshi aldini élish tedbirliri üstide jiddi izdenmekte.

Xitayning Firansiyede turushluq elchisi Zhao Jin Jün bashchiliqidiki Bu elchiler ömigining Sherqiy Türkistanda hökümet rehberliri bilen élip barghan söhbetlirining mezmonimu, Uyghur teshkilatlirining yuqarqi mölcherlirining toghriliqini ispatlap turmaqta.

Mesilen, < Xinjiang xewer tori > ning xewiride körsütülishiche, 8 – ayning 8 – küni aldi bilen bu ömekni, Xitay kommunistik partiyesi merkizi komuteti siyasi bürosining ezasi we < Aptonom rayonluq partikom > ning bash sekritari Wang qobul qilghan söhbet jeryanida ulardin, < Xinjiangning nöwettiki heqiyqi ehwali > din chetelliklerni xewerdar qilishni we Xinjing heqqide chet'elliklerge qaratqan teshwiqatni zor küch bilen kücheytishni telep qilghan.

Bu elchiler ömigi ziyaritini ayaqlashturup yolgha chiqidighan küni, yeni 8 – ayning 15 – küni < Aptonom Rayonluq Xelq Hökümiti > ning reyisi Ismayil Tiliwaldimu bu ömekni qobul qilip, < chet'ellerde turushluq elchilirimiz uzun yillardin buyan Xinjiangni yaxshi teshwiq qilip, Dunyaning Xinjiangni toghra chüshünishi üchün zor töhpe qoshti > dep teriplidi.

Ömek bashliqi Zhao Jin Jünmu Ismayil Tiliwaldigha qilghan sözide, < biz 8 künlük emiliy tekshürüsh élip bérish arqiliq, Xinjiangning iqtisadining tez tereqqi qilghanliqini, milletlerning ittipaq, Jemiyetning muqim ikenlikini körduq, qaytip barghandin kéyin, özimiz turushluq döwletlerde buni keng – kölemde teshwiq qilimiz > dep körsetken.

Bash elchi Zhao Jin Jünning yuqarqi sözliri, Xitay hakimiyitining tashqi teshwiqat jehette eslidiki stratigiyesini özgertishke hazirliniwatqanliqini körsütüp turmaqta, chünki Xitay merkizi hökümiti taki yéqin mezgillergiche chet'ellerde élip bériwatqan teshwiqatlirida, < Sherqiy Türkistan térorchiliri Xinjiangning muqimliqi we amanliqigha jiddi xewip séliwatidu, ularning zorawanliq heriketliri üzlüksiz dawam qiliwatidu > dep bayan qilip kelgen idi.