Alim Siyitof Ependining < Amerika Awazi > Téléwiziyeside Xitay Obzorchi Gao Xin Ependi Bilen Élip Barghan Munazirisi Uyghurlar Arisida Küchlük Inkas Qozghidi

< Dunya Uyghur Qurultiyi > ijra'iye komutétining reyisi, < Amerika Uyghur Birleshmisi > ning bash katibi Alim Siyitof ependining, ötken jüme küni ( 8 – ayning 11 – küni ) < Amerika Awazi > téléwiziyesining Xitayche < erkin munazire meydani > purogrammisida Xitay obzorchi Gao Xin ependi bilen Uyghurlarning milliy musteqilliq mesilisi heqqide élip barghan munazirisi, chetellerde yashawatqan uyghurlar arisida küchlük inkas qozghidi.

Birqanche kündin buyan chetellerde yashawatqan köpligen uyghurlar internetlerdiki munazire meydanlirida özlirining pikir – qarashlirini bayan qilip, Alim Siyitof ependige yuquri baha berdi we uni, < Uyghur xelqining heqiyqi iradisini we yürek sözlirini otturigha qoyghan > dep teripleshti.

Bu qetimqi munazire asasen ikki nuxtigha merkezleshken bolup, purogramma jeryanida Xitay obzorchi Gao Xin, < Xinjiang ezeldin Zhung Guoning ayrilmas bir parchisi, Zhung Guo demokratiyege köchkendin keyin, eger Xinjiangda musteqilliq mesilisi heqqide xelq rayini sinash élip berilsa, uyghurlar azsanliq orunda bolghini üchün, Xinjiangning musteqilliqi heqqide qarar élinmaydu > digen qarshni otturigha qoydi.

Alim Siyitof ependi Gao Xinning yuqarqi sepsetilirini emiliy pakitlar bilen qattiq ret qildi.

Alim ependi Gao Xin'gha qayturghan reddiyeside, Sherqiy Türkistan Xelqining tarixtin buyan musteqil yashap kelgenlikini, Manju impiratorluqining ishghali netijiside bu tupraqning namining < yengidin qoshuwélinghan zimin > digen menidiki < Xinjiang > gha özgertilgenlikini, manju istilasidin tartip, taki Kommunist Xitaylar Sherqiy Türkistanni ishghal qilghan 49 – yiligha qeder, bu ziminda meydangha kelgen milliy inqilaplar netijiside birqanche musteqil jumhuriyetning qurulghanliqini, hazirqi Kommunist xitay mustemlikichiliriningmu del ilgiriki manju we Guo Min Dang mustemlikichilirining warischisi ikenlikini otturigha qoydi.

Alim Siyitof ependi yene, Kommunizim aghdurulup, Xitay demokratiyege köchkendin keyin, eger Sherqiy Türkistanning teqdiri mesilisi heqqide Xelqning rayini sinash élip berilsa, birleshken döletler teshkilatining munasiwetlik pirinsiplirining rohi boyiche peqetla Sherqiy Türkistanning yerlik Xelqining Xelq rayini sinashta bilet tashlash salahiyitige ige ikenlikini, Sherqiy Türkistanning yerlik Xelqlirining Uyghur, Qazaq, Qirghiz, tajik, mongghol qatarliq milletlerdin ibaret ikenlikini, herqaysi Xitay hakimiyetliri teripidin Sherqiy Türkistangha pilanliq halda yötkep kélip yerleshtürülgen Xitay köchmenlirining omomiy Xelq rayini sinashta bilet tashlash salahiyitige ige emeslikini bayan qildi.