Xitay Saqchi Dayirliri Torghat Chegra Éghizida 298 Bombini Qolgha Chüshürdi

< Qeshqer hökümet tori > ning xewer qilishiche, 8 – ayning 7 – küni Xitay tamojna xadimliri Sherqiy Türkistanning Qirghizistan bilen tutushidighan Torghat chégra éghizida, melum bir shirketning Qirghizistandin import qilghan we paxotqa chiqirilghan polat matiriyalliri üstidin tekshürüsh élip bérish arqiliq, bu kéreksiz polat matiriyallirining arisidin hawadin yerge qoyup bérilidighan we yüksek partilash küchige ige 298 bombini bayqiwalghan.

Tekshürüsh netijiside, bu bombilarning sabiq Soweyt ittipaqi mezgilide yasalghan ayrupilandin yerge tashlinidighan bomma ikenliki, gerche bu bombilar hazir paxotqa chiqirilghan bolsimu, emma bezilirining ichide texichila partilatquch dorining barliqi eniqlanghan.

Yuqarqi xewerde, bu mallarni import qilghan shirket we munasiwetlik xadimlirining ismi tilgha élinmighan bolup, Xitay saqchi dayirlirining deslepki izahatigha qarighanda, Soweyt ittipaqi parchilanghandin keyin, bu bombilar Qirghizistanda tashlinip qalghan, emma Qirghizistan xelqining turmush ehwali qiyin bolghachqa, bu bombilarni Xitaydin kelgen sodigerlerge tashlanduq polat – tömür hésabida jinglap sétiwetken. Eger Xitay shirketliri uqushmay bu bombilarni éritish üchün otqa tashlisa, intayin éghir partilash weqesi tughulidiken.
Xitay tamojnisining bildürishiche, bundaq weqeler chégrada hemishe yüz bérip turidiken.