Amérikida Layihiliniwatqan "Pütün Yer Sharida Intérnét Pikir Erkinliki Qanuni" Xelqarada Qollashqa Érishti

2006.07.19 RFA

Fransiye agéntliqining washingtondin xewer qilishiche, Amerika dölet mejliside, Amérikining nyujérsi shtatidiki jumhuriyetchi dölet mejlisi ezasi Kristofér Simis ependining bashlamchiliqida otturigha qoyulghan "pütün yer sharida intérnét pikir erkinliki qanuni" hazir layihiliniwatidu. Bu qanun hazir amérikining dölet mejliside maqullinish aldida turuwatqanda, chégrisiz muxbirlar , xelqara kechürüm teshkilati, kishilik hoquq közütüsh teshkilati, Xitay uchur merkizi, lawgey fond jemiyiti, Amerika qelemkeshler jemiyiti qatarliq 14 xelqaraliq teshkilat uni qollap bayanat élan qilghan we bayanatlirida Amerika dölet mejlisidin bu qanun layihisini tiz maqullashni telep qilghan.

Qollashqa érishken layihe

Xewerde bayan qilinishiche, "pütün yer sharida intérnét pikir erkinliki qanuni" dep atilidighan bu qanun layihisi dunyadiki eng chong intérnét shirketliridin bolghan yaxu, gugul, maykrusoft, sisko qatarliq shirketlerning bezi heriketlirini chekleshnimu meqset qilghan. Bu shirketler Xitayda hökümet dairilirining intérnétke nazaret qilishi, oxshimighan siyasiy pikirdiki erbablarni axturup tépishi, bezi sezgür ibarilerni tor betliridin süzüp chiqiriwétishni qatarliq urunushliri üchün téxnika jehettin hemkarlashqan iken. Bash orgini parizhda turidighan xelqara uchur erkinliki teshkilatining bashliqi jüliyani amérikida layihiliniwatqan "pütün yer sharida intérnét pikir erkinliki qanuni"gha baha bérip "ishinimenki bu qanun zamanimizdiki bir chong ilgirilesh bolup qalidu" dégen.

Dunya uyghur qurultiyining bayanatchisi dilshat rishit ependimu bügün bayanat élan qilip, hazir Amerika dölet mejliside layihiliniwatqan "pütün yer sharida intérnét pikir erkinliki qanuni" ni qizghin qollidi.

Xitay hökümitining intérnéttiki oxshimighan pikirlerni basturushi jiddiy dawam qiliwatidu

Radiomiz muxbirining xewer qilishiche, chong quruqluqta hazir Xitay hökümitining intérnéttiki oxshimighan pikirlerni basturushi jiddiy dawam qiliwatidu. Jemiyette uninggha qarita qarshiliqimu nahayiti keskin we dadil.

Yéqinda Xitayda "démokratik partiyiler" dep atilidighan teshkilatlardin "gomindang inqilabiy komitéti" dégen organning tor bétide Xitay kommunist hökümiti chekleydighan bezi mezmunlar peyda bolup qalghan iken. Hökümet buninggha tedbir qollunup fujendiki bir tor bétini tarqitiwetken. Fujende Xitay hökümiti teripidin tarqitiwétilgen tor bétining xizmetchisi muxbirimizgha ehwalni sözlep bergen. Uning éytishiche, chong quruqluqtiki gomindang teshkilatlirining tor betliride tosattinla "gomindang kommunist partiyini himaye qilidu" dégendek ibariler peyda bolghan iken. Uning éytishiche, musteqil bir partiye héchqachan bashqa bir partiyining köz qarishini himaye qilmaydu. Shunglashqa u kishi shu tor bétige hujum qilip kirip, uninggha "üch yilliq chong apet xatirisi", "sekkizinchi armiyining pingshinguen urushi heqqide yézilghan saxtiliqlar" dégendek 9 parche chong maqalini kirgüzüp qoyghan. Shuningdin kéyin Xitay hökümiti fujendiki bir tor bétini izdep tépip taqiwetken.

Xitay hökümiti taqiwetken fujendiki bu tor béti xizmetchisining muxbirimizgha éytip bérishiche, u kishi gerche hökümetning tor betlirige kirip uningdiki mezmunlarni pütünley özgertiwiteleydighan qabiliyetke ige bolsimu, emma undaq qilmay, peqet kommunist partiyining köz qarishigha oxshimaydighan maqalilarnila kirgüzüp qoyup, bu arqiliq ularni agahlandurghan. Bu kishi hazir özining xeter ichide ikenlikini bilidiken, emma u özige xas étiqat, ishench we qabiliyet bar adem bolghachqa, u hazir özige kélidighan xeterge psen qilmaydiken. (Weli)