Bügün Germaniyening München Sheheride Xitay Hökümitige Qarshi Heywetlik Naraziliq Namayishi Ötküzüldi

Öz xewirimiz: Bügün yeni 2006-yili 6-ayning 9-küni „Dunya Uyghur Qurulti“yining orunlashturishi bilen, Germaniyede yashawatqan Uyghurlar, Germaniyening medeniyet merkizi München sheheride „Yawropa Sherqiy Türkistan Birligi“ we „Sherqiy Türkistan Informatsion Merkizi“ning yétekchilikide, Xitay hökümitining xelq'ara kishlik hoqoq pa'aliyetchisi, Uyghurlarning meniwi anisi Rabiye Qadir xanimning ailisidikilerdin Ablikim Abdureyim, Alim Abdureyim we Rushengul Abdureyim we insan heqliri pa'aliyiti bilen shughuliniwatqan biguna siyasiy öktichilerdin Toxti Tuniyaz, Abdughéni Memtimin, Nurmemet Yasin, Küresh Hüseyin hem Hüseyin Jelil qatarliqlarni naheq jazalawatqanliqigha naraziliq bildürüsh yüzisidin keng külemde namayish uyushturdi.

Namayishchilar Münchindiki Xitay elchixanisi aldigha toplunup, „Xitaylar wetinimiz Sherqi Türkistandin chiqip ketsun!“ , „ Yoqalsun Xitaylarning dölet térori!“, „ Siyasi öktichilerge erkinlik!“, „Milliy rehbirimiz Rabiye xanimning balilirigha erkinlik!“, „ Biz Xitay tajawuzchillirining millitimizge qaratqan érqiy qirghinchiliqini toxtitishini telep qilimiz!“, „ biguna türmige tashlanghan siyasiy pa'aliyetchillirimizni qoyup bersun!“, „ Yashisun Sherqi Türkistan!“, „Yashisun milliy musteqilliq!“ degen shuarlarni towlap, we Xitayning tajawuzchiliqigha qarshi mezmundiki shiérlarni kollektip xor sheklide deklamassiye qilip, xelqimizning yürek sadasini pütün dunyagha anglatti..

Bu namayish Germaniye waqti ettigen saet 10:00 da bashlinip 12:00 giche dawam qildi. Namayishchilar bashtin axir intayin jushqun qiyapette élip bérilghan naraziliq pa'aliyiti arqiliq etrapqa toplanghan her türlük médiye we German jamaetini heyran qaldurdi. Sorunning amanliqigha mesul qilip ewetilgen German saqchilliri illiq tebessumliri arqiliq, xelqimizning élip bériwatqan heqqaniy küreshlirige medet berdi we namayishchilarning bixeterlikini qoghdidi.
Amerika Erkin Asiya Radiosi qatrliq orunlardin kelgen muxpirlar namayishchilarni ziyaret qilip, xelqimizning yürek sadasini dunyagha anglitidighanliqini bildürdi.

Namayishlar, namayish jeryanida özlirining ana wetini üchün élip bériliwatqan , Xitaylarning Sherqiy Türkistan xelqige yürgüziwatqan téroristik siyasitige qarshi yézilghan shuarlarni towlap we shiérlarni deklimatsiye qilghanda tesirlengenlikidin yighlap tashlidi. Yoldin ötüwatqan we namayishchlarning etrapigha toplanghan Yawropaliqlar Namayishchilar towlighan Germanche shuarlargha jör bolup, Xitay hökümitining Uyghur xelqige qaratqan dölet terorini eyiplep, Sherqiy Türkistan xelqige jümlidin namayishchilargha bolghan semimiy hesiyatini ipadilidi.

Xewerni teyyarlighuchi: Roz - Mohammed Goper.