Frankfurt Sheheride Birleshme Namayish Ötküzildi

Gérmaniyening Frankfurt sheheride Xitay tajawuzchillirining wetinimiz Sherqiy Türkistanda yürgüziwatqan qanliq qirghinchiliqigha qarshi keng-kölemlik namayish élip bérildi.

Wetinimiz Sherqiy Türkistan Xitay mustemlikisi astigha chüshüp qalghan 60 yildin béri, qanxor xitaylarning qilmighan eskilikliri qalmidi. Sherqiy Türkistan Xelqi her türlük insaniy we qanuniy heq-hoquqliri tartip élinip, insaniyet tarixida az körülidighan milliy zulumgha muptila qilindi.

Xitaylar xelqimizge öktemlik bilen muamile qilip, yer asti we yer üsti bayliqlirimizni talan-taraj qilghandin bashqa „Sözliseng tilingni késimen, qarisang közüngni oyimen“ dégendek bir qatar pashistik siyasetlerni qollunup, xelqimizni nadan we namrat qaldurush süritini tizlitip, xelq ichide otturgha chiqqan naraziliq keypiyatlirini, dölet térorini ishqa sélip basturdi.

Bolupmu 2009-yili kirgendin béri, Xitay tajawuzchilliri téximu wehshiyliship, insanlirimizni mejburiy qullar emgikige tutti, pilanliq tughut sewebidin buwaqlirimizni qetliam qildi, yash anilarni saqaymas kesellerge giriptar qildi. Uningdin bashqa qiz-yigitlirimizni türkümlep tutqun qilip, kolliktip muddetlik we muddetsiz qamaq hem ölüm jazasi bérish yolliri bilen jazalap, millitimizning milliy ghururigha tegdi.

Xitaylar shundaq turuqluq, xelqimizge her türlük betnamlarni chaplap, her tereptin xelqara jemiyetke millitimizni yaman körsütüshke orunup, özlirining yürgüziwatqan érqiy we kultural qirghinchiliqini qanunluq qilishqa orunup kelmekte. Bu yil Xitayning Shawgüen sheheride otturgha chiqqan qanliq weqede 50 tin artuq qérindishimiz hayatidin ayrildi, 100 ligen qérindishimiz tömür kaltekler bilen dumbalinip, palta we qilichlar bilen chanilip éghir yarilanduruldi. Jinayetchiler jazalandurulmidi, ziyankeshlikke uchrughichilar „Öltürmekning üstige tepmek“ dégendek qopal muamililerge uchridi. Shuning bilen Xelqimiz Ürümchi qatarliq sheherlerde qozghulup, tinch shekilde Xitay hökümitidin heq-adalet telep qilghan bolsimu, hökümet teripidin quralliq inkas qayturulup, 3mingdin artuq kishini qirip tashlap, 10,000din artuq kishini türmilerge tashlidi we ularni éghir iskenjige élip, mejburiy iqrarname yazghuzup, zorluq bilen imza atquzup, arqa-arqdin öltürmekte.

Xitay döliti shundaq turuqluq, xuddi Sherqiy Türkistanda héch ish yüz bermigendek her yili Gérmaniyening Frankfurt sheheride ötküzilidighan medeniyet we insanperwerlikning simwoli bolghan Kitap yermenkisige sahipxanliq qilidighan sherep méhmini boliwélip, Shehitlirimizning issiq qanliri qurimighan qolliri bilen yézilghan kitaplarni xelqarada bazargha saldi.Bu yilliq Frankfurt xelqara kitap yermenkisi 2009-yili 10-Ayning 14-künidin 18-künigiche dawamlashti.

Shu seweptin Gérmaniyening Frankfurt Sheheridiki Sherqiy Türkistan Birliki teshkilati, 2009-yili 10-Ayning 14-Künidin 17-Künigiche Xelqara kitap yermenkisi aldida paaliyet orunlashturup, Xitay tajawuzchillirining qanliq jinayetlirini pash qildi.Bolupmu bu qétim ötküzülgen paaliyetler ichide, Dunya Uyghur qurultiyining qollap-quwetlishi we Türk teshkilatlirining aktip awaz qoshushi bilen élip bérilghan mushu ayning 17-küniki namayish alayide netijilik boldi.

Namayishchilar awal Frankfurt Sheherining merkiziy wogzali aldigha toplinip, Sherqiy Türkistannning azatliq we höriyitige simiwol bolghan ay-yultuzlauq kök bayraq, Xitaylar teripidin öltürülgen shéhitlar, qattiq basturuliwatqan ana-balilarning namayishi, zorawan xitay eskerliri we türmide yétiwatqan bigunah ezimetlirimiz qatarliqlarning resimliri we Xitaylarning tajawuzchiliqigha, érqiy we kultural qirghinchiliqigha qarshi shuarlar yézilghan her türlük taxta we pilakatlarni kötürüp, Frankfurttiki Xitay bash konsulxanisining aldigha yürüsh qildi we u yerde meniwiy animiz, milliy herkitimizning yolbashchisi, Dunya Uyghur qurultiyining reyisi Rabiye Qadir xanimning yitekchilikide Xitaylargha bolghan cheksiz nepret we hörlük we azatliqqa bolghan intilishliri ichide bir meydan namayish élip bardi.Namayish jeryanida „Qatil xitaylar, Uyghurlarni öltürüshni toxtat!“, „Xitaylar wetinimiz Sherqiy Türkistandin chiqip ketsun!“, „ Bizge azatliq kérek!“, „Siyasiy mehbuslar qoyup bérilsun!“, „Yoqalsun Xitay tajawuzchilliri!“ degendek shuarlar towlandi.

Namayish Gérmaniye waqti saet 14:00 de bashlinip, 17:00 giche dawam qildi. Bu namayishqa Shiwitsiye, Gollandiye, Bélgiye qatarliq döletlerdin kishiler qatnashqandin bashqa Gérmaniyening München qatarliq chong- kichik sheherliride yashawatqan Uyghurlar we qérindash türk teshkilatliridin bolup 500 ge yéqin kishi qatnashti. Namaysih jeryanida tesirlik notuqlar sözlendi, namayish intayin tertiplik, janliq we jelip qilarliq shekilde élip béridi. (K.A)

Sherqiy Türkistan Birliki Teshkilati Teshwiqat Merkizi

18.10.2009