Gollandiyediki Uyghur Dawasini Kücheytish Heqqide Ortaq Hemkarliq

Öz xewirimiz : Kéyinki yillardin Gollandiyege kélip siyasi panahliq tiligen Uyghurlarning sani téz köpeygini üchün, hazir bu döwlette yashawatqan Uyghurlar Gollandiye hökümet tarmaqlirining, shundaqla kishilik hoqoq teshkilatlirining eng küchlük diqqitini qozghawatqan milletlerning birige aylinip qaldi.

Sherqiy Türkistan we Uyghurlar mesilisining Gollandiyediki tesirchanliqini yenimu kücheytish we bu döwletke kelip siyasi panahliq tiligen Uyghur qérindashlarning milliy dawayimizgha bolghan aktipchanliqini qozghash meqsidide, yéqinda Germaniyediki < Sherqiy Türkistan Informatsiyon Merkizi > ning reyisi Abdujelil Qaraqash ependi bilen Gollandiyediki < Sherqiy Türkistan Uyghur Birliki > ning asasliq mesulliri bir arigha kélip, bundin kéyin özara hemkarliqni yenimu kücheytish we masliship paaliyet élip bérish heqqide ortaq pikirge kélishti.

Gollandiyediki < Sherqiy Türkistan Uyghur Birliki > ning muawin reyisi Eysa Qari Hajim teripidin unung öyide uyushturulghan bu qétimqi hemkarliq yighinigha, Gollandiyediki qérindashlirimizdin Helden rayoni etrapidiki qérindashlar teklip bilen qatnashti.

Bu qétimqi hemkarliq yighinida, Gollandiye we ununggha xoshna bolghan Bilgiye we Germaniyelerde Xitaygha qarshi birleshme namayishlarni uyushturush, bu döwlette yashawatqan Uyghurlar arisida siyasi, ijtimayi we mediniyet paaliyetlirini kücheytish, Uyghurlarning nöwettiki omomiy weziyiti we Xitay hakimiyitining Uyghurlargha séliwatqan zulumliri namayen qilinghan teshwiqat waraqliri, biroshurlar we resimlik kitap – jornallarni hazirlap chiqip keng dayiride tarqitish … qatarliq mesililerde ortaq pikir we qarargha kélishti.