Lenet Sizge Kök Bayraqtin Qachqanlar!

Yekendiki bashlanghuch mektepte Xitay oqutquchining hazirche melum bolghan sanliq melumattin qarighanda 23 neper nariside kichik Uyghur qizlirigha eng rezil wastilar bilen basqunchiliq qilishi, Uyghur xelqini chidighusiz xorluqqa paturupla qoymay bu échinishliq weqe chetellik tingshughuchilarningmu qattiq ghezep nepritini qozghidi. Anglighanla adem u Xitayni ghezep bilen iplas haywan dep haqaretlimey turalmidi, Ishinimenki bu weqeni agnlighan herqandaq adem azaptin üch kün tamaq yiyelmidi bolghay. Emma özimizdin bolghan gherp döletliride yashawatqan bir xanimning bu weqeni anglighanda qilche azaplinish bu yaqta tursun eksinche : “bu normal ehwalghu bundaq ehwallar dunyaning hemmila yeride bar” digenligi méni bu weqedinmu öte azapta qoydi.

Shundaq, bundaq jinayi herketler dunyaning hemme yéride uchrap qélishi mumkin. Emma Yekendiki weqe ene shundaq dunyaning bashqa jayliridimu uchritishqa bolidighan adettiki balilarni xarlash jinayi herketi bolmastin belki xaraktéri tüptin ohshimaydighan milli xarlash herkitidur. 23 neper kichik bala xarlanmidi 20 milyon Uyghur xarlandi. 20 milyon Uyghurning izzet nepsi yerge uruldi. Uyghurlarning bésiwélinghan ziminda mustemlike astida Alla her bir insangha mensup qilghan barliq hoquqlardin pütünley mehrum qilinip depsende qiliniwatqanlighi téximu ochuq ashkara ispatlandi.

Dunyaning bashqa yerliride gerche bundaq peskesh jinayi weqelerni uchritishqa bolsimu emma u weqede siyasi meqset yoq. Emma Yerkendiki balilarni jinsi jehettin xarlash weqesi pütünley siyasi tüs alghan bir weqe bolup, Xitay oqutquchi ochuq ashkara halda men Uyghurlagha bek öch digen. U nime üchün Uyghurlargha öchlük qilidu? bu del ularning özliri bésiwalghan bu zéminda men'gü xatirjem bolalmaywatqanlighini Uyghurlarning ularning közige qadalghan miq bolup qalghanlighini haman bir küni qoghlandi bolidighanlighidin qattiq ensirep derdini hazirdin bashlap éliwatqanlighini körsetmemdu? Bu Xitay oqutquchining yürigini shunche yoghantiwetken zadi nime? Yenila Xitay hakimiyetining Uyghurlani basturush kemsitish siyasiti bolmay nime?!

Kommunist Xitay ishghaliyitidin béri, baylirimizni qirip tügetti Uyghurlarni iqtisadtin ayridi, andin ziyalilirimizgha, kitaplirimizgha, asare étiqillirimizge mediniytimizge dinimizge we tilimizge tohxtimay hujum qilip keldi. Iqtidarliq yashlirimizni yigitlerni yiltizidin qurutushqa urundi ularmu tügigende qizlirimizgha hujum qildi, emdi ularning hujum qilish nöwiti balilargha kelgen idi. Atalmish qosh tilliq ma'arip bahanisi bilen balilar Xitay mekteplirige ewetip, her küni Xitay oqutquchilarning derdini chiqiriwalidighan oyunchighigha aylinip orunsiz tayaq yep jismani jehettin xarlinipla qalmay jinsi jehttimu xarlanmaqta. Xitay mektepliride oquwatqan oqughuchilardin alqinigha bambuk tayighida tayaq yep qolliri ishship xet yazalmay qalghudek halgha kélip qalmighinidin birsimu yoq. Ejiba kommunist Xitayning balilarni qoghdash qanuni , Xitay feudalliq jemiyitidin qalghan alqangha bambuk tayaqta urushni cheklesh qanuni nime üchün Uyghur balliirigha ishlitilmeydu? Buning arqa körünishimu del siyasi mustemlikichilk we kemsitish xaraktérini alghan bolmay nime?

Yeken weqesini qandaqmu dunyaning bashqa yerliridki jinayi herketlerge sélishturghili bolsun? Dunyaning bashqa yerliride tasaddipi yüz bérip qalidighan bu xil jinayi herketler yerlik qanun boyiche éghir jazagha tartilidu, emma Yekendiki weqe nime üchün chirayliqche basurulup, jawapkar Xitay héchqandaq jazagha tartilmidi?

Yeken weqesi éniq shekildiki milliy échmenliktin kélip chiqqan, shundaq iken hazirghiche téxi bayqalmighan yene qanchilik rezil jinayi qilmishlar Xitay mektepliride ballirimizning hayatini weyran qiliwatqan bolushi mumkin?
Shunchila éghir xorluqqa qandaq chidawatqandu bu xelq? Boptighu ularning béshigha miltiq tengleglik. Emma weten sirtidiki qerindashlarchu? Nurghunlirimiz qandaqmu nomus qilmay u qeder éghir xorluq ichide yashapmu bir éghiz Xitaygha qarshi towliyalmaysiz? Bahaningiz wetenge bérip kélish, siz shunchilik ishtimu ige chiqalmighan millitingizning yénigha nomus qilmay qaysi yézingiz bilenmu bararsiz? Siz kim dise Uyghur deymiz emma biz mushundaq kétiwersek Uyghurni dunyada birtiyinge almas qiliwétimiz, chünki biz özimizning qedrini qilishni bilmisek bashqilar qandaq qilidu? bu qeder morimes milletke herqandaq adem ismingizni anglisila Xitay yigizip qoyghan millet bu qanchilik birnimiler idi bayqushlar dimektin bashqa nimimu disun. Emma bezi Uyghurlirimiz bar buningghimu razi. Qosighi toq bolsila astida mashinisi olturghidek öyi puli bolsila boldi. Sizge hayatta puldin bashqa héchqandaq qimmetlik nerse yoqmu? Qedir qimmetni pulgha sétiwalghili bolidighan nerse emes. Uni sizning xelqingiz béridighan nerse!!! Emma bundaq Uyghurlar haman yalghuz qalidu we mengu qedirsiz xar ötidu. Xelqning közi qarghu emes, undaqlarni waqti kelse tükürgen tükrigige almaydu. Siz kim dise Uyghur deymiz téxi (ésit shu eziz namgha) chünki bashqa héchnerse boliwalalmaymiz , shunga Uyghur diyishnimu amalsiz deymiz. Emma bilemsiz? Uyghur digen yeydighan nerse yaki siz pishanignizge yézipla qoysingiz bolidighan nerse emes . U bir milletning ismi! Qandaq millet u? qandaq millet pexirlik millet? Ularning zémini barmu? Döliti bolghanmu? Bayrighi barmu? Emma siz bularning hemmisidin erkin döletlerde yashawétipmu qachisizyu qilche nomus qilmastin özingizni Uyghur deysiz. Uyghur dimek Kök bayraq dimek ! Uyghur dimek Sherqiy Türkistan dimek! Siz bulargha yéqin kélelmisingiz, Uyghur digenning menisini qandaqmu chüshendüreleysiz?. Chünki bayraqsiz, wetensiz millet peqet aq qeghezdiki qara siya, yaki u bir xorluqni, qulluqni raziliq bilen qobul qilghan millet!!! Shundaqken qaysi salahiyet bilen özingizni Uyghur deysiz? Uyghurning ghururini qoghdash üchün birer kelime söz yaki herket qilalmighan, kök bayraqni kötürelmigen, öz wetining isminimu unutqan ademing özini Uyghur diyishke salahiyiti men'gü toshmaydu!!!! Emma siz bek bichare, bu halingiz bilen bashqa birnersimu bolalmaysiz !!!

Beziler bar kök bayraqni weten azad bolghanda kötürimen hazirche xatirjem jim türimen deydighan. Kim xalimaydu xatirjem turushni , weten yalghuz ikki tok tok siyasi paaliyetchi Uyghurning wetinima? Sizmu jim tursingiz menmu jim tursam kim azat qilidu shu wetenni?

Tewbe deymen bu qeder sebirlik milletke! Tepse tewrimeydighan pütün sézimlirini , yürigini yoqatqan tirik murda millet!!! Emdi bu milletke uningdinmu artuq xorluqlar kélishi tebi. Chunki Uyghur digen ene shundaq momin, ene shundaq untulghaq ene shundaq baghri pes, ichi échishmaydighan chidashliq millet iken emesmu? Pursiti barliri erkin ellerde qarshiliq korsitishke yarimisa wetendikillirige nimimu deyli!!!!

Hemmidin insanni échindürdighini shuki Sherqiy Türkistanni sétip, Uyghur digen namni sétip, ana wetinimizki Xitay zulmigha qarshi küresh qiliwatqan mujahidlirimizning qénini sétip, buning bedilige wetende qilmighan ishni qildim dep gherip döletliride siyasi panahliq tilep, Uyghur teshkilatlirigha yalghan ispat yazghuzup gerib döletliride qélish üchün közbuyamchiliq qilghan saxtikarlarning haligha qaraydighan bolsaq, buyerdiki yalghan iltijachilarning kök bayraqtin qéchishi insanni nahayiti oygha salidu. Mana bundaq kishilerni Uyghur diyishke bolmaydu hetta insan diyishkimu bolmaydu. Chünki bularning Uyghurluq we insanliq bilen héch alaqisi yoq.

Mana buningdek öz wetini we öz xelqini satqan dawani suiyistiqmal qiliwatqan Uyghur süritidiki saxtikarlargha Uyghur teshkilatliri hergiz Uyghurliqi heqqide ispat yézip bermesliki kérek. Undaq bolmaydiken buningdek yalghan isppatning hésabini xelqimiz bir küni alidu. Mana bundaq insanlar weylun dözaqta köyidighan kishiler özi shu! Bundaq Uyghurlardin qorqush kérek bundaq ademler gherip döletliri emes sheytannimu aldaydu.

Rukiye Turdush