Abdujelil Qaraqash, Guantanamodiki Uyghurlar Mesilisi Heqqide Türk – Islam Dunyasini Eyiplidi

Öz xewirimiz : < Sherqiy Türkistan Informatsiyon Merkizi > ning reyisi Abdujelil Qaraqash ependi, ötken hepte Germaniyening Duisbrug shehride 10 minglighan kishining qatnishishida ötküzülgen < Türk – Islam mediniyet künliri > paaliyitining echilish murasimida qilghan sözide, Uyghur xelqi bilen qan qerindash we dindash hisaplanghan Türk – Islam ellirining, Guantanamoda naheq tutup turulghan we Amerika soti teripidin gunahsiz dep höküm chiqirilghan Uyghur tutqunlar mesiliside izchil türde passip pozitsiyede bolup kelgenlikini, hazirgha qeder Türkiyenimu öz ichige alghan hech bir Türk – Islam döwletlirining Guantanamodiki uyghur tutqunlargha ige chiqmighanliqini qattiq eyiplidi.

Germaniyediki < Kanal Yawropa > téléwiziye istansisi teripidin uyushturulghan, Germaniye we ununggha xoshna ellerdiki Türk teshkilatlirining mesulliri we Türk konsulliri, shundaqla Duisbrug shehride yashawatqan köpligen Türk qerindashlarning qatnishishida ötküzülgen bu qétimqi < Türk – Islam mediniyet künliri > paaliyitige, Türkiyedinmu alahide milliy chélishchilar teklip qilindi.

Bu qétimqi paaliyetke teklip bilen qatnashqan Abdujelil Qaraqash ependi, échilish murasimida qilghan sözide, Guantanamodiki Uyghur tutqunlarning hemmisining, Xitayning zulum we besim siyasitining biwaste qurbanliri ikenlikini, ularning terorizim bilen hech bir alaqisining yoqluqini we ularning gunahsiz ikenlikining Amerika soti teripidin ispatlinip, hazirgha qeder ikki türkümde 9 neper Uyghurning qoyup berilgenlikini, qalghanliriningmu qoyup berilish aldida turghanliqini eskertip ötkendin kéyin, birinchi türkümdiki 5 neper Uyghurning Albaniyege, ikkinchi türkümdiki 4 neper Uyghurning Engiliyening konturolliqidiki Bermuda arallirigha orunlashturulghanliqini, epsuski birmu Türk – Islam döwlitining ularni qobul qilishqa jüret qilalmighanliqini, hetta ulargha ashkare hesdashliq qilishtinmu özini qachurup kelgenlikini, ularning buxil pozitsiyesining Uyghur xelqi ichide Türk – Islam dunyasigha nisbeten eghir ishenchisizlik tuyghusi peyda qilghanliqini bayan qildi.

Bu qétimqi paaliyet jeryanida, < Sherqiy Türkistan Informatsiyon Merkizi > teripidin mexsus < Uyghur chediri > qurulup, 5 métirliq ay – yultuzluq dew bayraq uyghur chedirigha esildi, Uyghur chediri Uyghurlarning milliyche kéyim – kechekliri, Sherqiy Türkistan we Uyghurlar tonushturulghan resimler bilen bizeldi, milliy rehbirimiz Rabiye xanimning, < ejdiha bilen élishqan ayal > namliq germanche kitapi, paaliyetke qatnashqan Türk qerindashlarning alahide diqqitini qozghidi, Uyghur chedirigha yene Sherqiy Türkistan we Uyghurlar heqqide yezilghan köpligen Türkche kitaplar, shundaqla Xitayning zulumi bayan qilinghan teshwiqat waraqliri qoyuldi.

Bu qétimqi paaliyetke, < Gollandiye Sherqiy Türkistan Uyghur Birligi > ning muawin reyisi Eysa Qarim bashchiliqidiki 4 kishilik bir heyetmu kélip qatnashti.

3 kün dawam qilghan bu qétimqi paaliyet jeryanida Abdujelil Qaraqash we Eysa Qarim bashchiliqidiki Uyghur heyiti köpligen Türk teshkilatlirining mesulliri bilen biwaste körüshüp, ulargha Xitayning Uyghurlargha qaratqan zulum we besim siyasiti heqqide étirapliq melumat berish imkaniyitige érishti.