|
Uyghur Musulmanlirining Mutleq Köp Qismining Qurbanliq Qilish Imkaniyiti Yoq
Wetendin kelgen xewerlerdin melum bolushiche, bu yilliq Qurban héytning
yeqinlap kélishi bilen, Sherqiy Türkistan rayonida kala we qoy göshining
bahasi shiddet bilen örlep ketken.
Hazir bir kilogiram sungeklik qoy göshining bahasi 40 yuan, loq göshning
bahasi 50 yuange qeder chiqqan.
Mesilen, bir Uyghur normal bir qurbanliq qoyni sétiwélish üchün eng az
bolghandimu 1000 – 1200 yuan hejlishi lazim.
Nöwette Sherqiy Türkistanning Uyghurlar zich olturaqlashqan jenobi
rayonlirida, bir Uyghur déhqanning yilliq kishi béshigha toghra kélidighan
otturiche kirimi hökümetning istatiskilirida körsütülishiche 1200 – 1500
yuan etrapida bolup, bu rayonlarda yene yilliq sap kirimi 700 yuandin töwen
bolghan Uyghur déhqanlirining sani 1 milyon 500 mingdin ashidu.
Dimek, bir Uyghur déhqan normal bir qurbanliq qoy sétiwélish üchün texminen
bir yilliq kirimini serip qilishi lazim.
Xitay istatiskilirida körsütülishiche hazir Uyghurlarning omomiy sani 10
milyongha yéqin bolup, bularning 85 pirsenti déhqanlardin ibaret.
Dimek, nöwette hökümet orunlirida ishlewatqan Uyghurlarni hésapqa almighanda,
80 pirsenttin artuq Uyghurning qurbanliq qoy sétiwélish küchi yoq.
Gerche hazir Sherqiy Türkistan Xitay boyiche eng asasliq charwichiliq
rayonlirining biri hésaplansimu, emma hökümet tarmaqlirining Xitayning ichki
ölkilirige pilansiz halda keng kölemde qoy – kala yötkep sétishi netijiside
bazar qalaymiqanliship, göshning bahasida dawamliq éshish körülmekte.
Nöwette Sherqiy Türkistan Xitayning eng asasliq néfit, tebigaz, kömür, altun
ishlepchiqirish bazisi bolup, ötken bir yilda bu rayonda ishlepchiqirilghan
néfit miqdari 26 milyon 400 ming tonnigha, tebigaz bolsa 21 milyart 100
milyon küp métirgha yetken.
Uning üstige Sherqiy Türkistandiki eng zor néfit bazisi bolsa Tarim
néfitliki bolup, Uyghurlarning yérimidin köpreki Tarim wadisida yashap
kelmekte.
Emma Uyghurlarning öz wetinining tebiy bayliqliridin paydilinish hoqoqi yoq
bolup, Xitay hakimiyitining iqtisadi jehette periqliq siyaset yürgüzüshi
netijiside hazir bu rayonda turmush sewiyesi we kirim jehette Uyghurlar
bilen Xitay köchmenliri otturisidiki periq üzlüksiz éship barmaqta.
Xitay istatiskilirida körsütülishiche, nöwette Sherqiy Türkistanda
sheherlerde yashawatqan Xitay köchmenlirining yilliq kishi béshigha toghra
kilidighan kirimi 10 ming yuandin, Bing tuanni asas qilghan yézilardiki
Xitay déhqanlirining kirimi bolsa 6000 yuandin ashqan.
|
