Germanidiki Uyghurlar Rozi Héyt Namizini Birlikte Ötküzdi

Yillardin buyan Germaniyede Yashawatqan Uyghurlar héyt namazlirini birlikte ötküzüp, kolliktip halda héytlash elip bérishni adetke aylandurup kelmekte we bu arqiliq bir – birining héytini mubarekliship, bir – birige bolghan güzel arzu – isteklirini ipade qilip kelmekte. Bügünmu, Germaniyening München shehride yashawatqan Uyghur qérindashlar, < Dunya Uyghur Qurulti > ning ishxanisigha toplunup, Qurultay diniy ishlar komutetining reyisi we Germaniyediki Uyghur jama’itining imami Turghunjan Hajimning riyasetchilikide Roza héyt namizini birlikte ötküzdi.

Gerche bügün Germaniyede ish waqti bolsimu, emma bügün etigen sa’et 08:00 de bashlanghan héyt namizigha München shehride yashawatqan köp sandiki Uyghur kelip qatnashqan idi.

Diniy zatlirimizdin Turghunjan Hajim we Abdujelil Emet qarimlar héyt namizining aldida bergen xutbiside, weten ichide kommunist Xitayning zulmi astida xorlunup yashawatqan we Roza tutush, tirawih namizi qilish, héyt namizigha qatnishishqa oxshash normal diniy mejburiyetlirini ada qilishtinmu mehrum qeliwatqan Uyghur qérindashlirimizgha janabi allahtin bexit – sa’adet we xeyirlik tilesh bilen birge, chetellerde yashawatqan qérindashlirimizni wetenperwerlikke, inaq – ittipaqliqqa, birlik – barawerlikke dalalet qildi.
Imam Turghunjan Hajim namazdin keyinki du’asida, Uyghur mosulmanlirigha qan yighlitiwatqan mustebit kommunist Xitay hakimiyitige lenet yaghdurush bilen birge, Sherqiy Türkistangha musteqilliq, Uyghur xelqighe hörlük we erkinlik tilidi.

Namazdin kéyin Uyghur qérindashlar bir – biri bilen quchaqliship körüshüp, özara héytlirini mubarekleshti.

Héyt namizidin keyin jama’et, < Dunya Uyghur Qurultiyi > ning merkezdiki rehberliri, < Sherqiy türkistan informatsiyon merkizi > we < Yawropa Sherqiy türkistan birliki > teshkilatining mesullirining bashlamchiliqida, Miyonhin shehride yashawatqan Rehi ependim we Reyhangül xanimlar teripidin echilghan < Teklimakan resturani > gha toplunup kolliktip héytlash elip bardi.

Xitayning belgilimisi boyiche bu yilliq Roza héyt Sherqiy türkistanda 10 – ayning 2 – küni bashlinidu.

Wetendin kelgen xewerlerdin melum bolushiche, Roza héytning yeqinlap kelishi bilen Xitay hakimiyiti Uyghur mosulmanlirigha qaratqan basturush we qattiq nazaret qilish heriketlirini alahide küchéytken bolup, keyinki heptilerdin buyan, héyt munasiwiti bilen tuqqan yoqlash we ayilisini ziyaret qilish üchün seperge chiqqan köpligen Uyghurlar, < Salahiyet guwanamisi yoq >, < gumanliq unsur > digendek sewepler bilen tutup ketilgen.

Her derijilik diniy ishlar idarilirimu héyt harpisida herqaysi chong – kichik mesjitlerning imamlirini toplap mexsus yighin échip, ularni Héyt xutbisi qilmasliq, jama’etke diniy teshwiqat élip barmasliq, namazni tez tügitish we namazdin keyin jama’etni derhal mesjittin chiqirish heqqide agahlandurghan.

Yene shundaqla héyt namizi mezgilide atalmish < gumanliq unsur > we < radikal islamchilar > ni küzitish we bayqash meqsidide herqaysi mesjitlerning etrapigha mexsus saqchi we xelq eskerlirini orunlashturghan.

Izahat: bu qétim Germaniyede ötküzülgen héyt namizi we kolliktip héytash pa’aliyitining emiliy körünüshlirini „uygur.tv“ din körgeysiz.