|
Xitayning Ürümchi we Qeshqerdiki Qanliq Basturushigha Qarshi Germaniyede
Namayish Ötküzüldi
Milliy rehbirimiz we DUQ reyisi Rabiye xanimning chaqiriqigha asasen, 7 –
ayning 12 – küni ( shenbe ) chüshtin keyin Germaniyening Miyonhin shehride,
mustebit Xitay hakimiyitining mushu ayning 8 – küni Ürümqide 5 neper bigunah
qérindishimizni wehshilerche shéhit qilghanliqi, yene shundaqla oxshash
künde Qeshqerde 20 neper bigunah Uyghur üstidin ochuq sot echip, 5 neper
qérindishimizni ölüm jazasigha höküm qilghanliqigha naraziliq bildürüsh
munasiwiti bilen keng kölemlik naraziliq namayish ötküzüldi.
DUQ terkiwidiki < Yawropa Sherqiy Türkistan Birliki > teshkilati bilen, <
Sherqiy Türkistan Informatsiyon Merkizi > teripidin birlikte uyushturulghan
we Miyonhin shehrining merkizi hisaplanghan < Karlplatz – Stachus meydani >
da ötküzülgen bu qétimqi namayishqa, Miyonhin shehride yashawatqan
Uyghurlardin bashqa yene Xelqaraliq kishilik hoqoq teshkilatlirining
mesulliri, Uyghurlargha hesdashliq qiliwatqan chetellik dostlardin bolup köp
sanda kishi qatnashti.
Germaniye waqti chüshtin keyin 17:00 – 19:00 ghiche dawam qilghan bu qétimqi
namayish, meydandiki nechche minglighan yerlik xelqning alahide diqqet –
étibarini qozghidi.
Gerche bu qétimqi namayish qattiq yamghur astida élip bérilghan bolsimu,
emma namayishqa qatnashqan qérindashlirimiz Sherqiy türkistanning ay –
yultuzluq kök bayriqini we Xitay hakimiyitining wehshi qirghinchiqiligha
qarshi sho’arlar yezilghan lozunka – taxtilarni igiz kötürüshüp, weten
ichide bigunah shehit qilinghan qérindashlirigha bolghan chongqur qayghusini
izhar qilish bilen birge, Xitay hakimiyitining rehimsiz qirghinchiliqigha
bolghan ghezep – nepritini bildürüshti.
Namayish meydanining merkizige shehitlirimiz üchün ay – yultuzluq kök bayraq
we güller bilen bizelgen mexsus teziye munbiri yasalghan bolup, üstige
qanliq kipenlerni keyip, zenjir – kishenlerni kötürüshken 6 – 7 neper
namayishchimiz taki namayish axirlashqangha qeder ün – tünsiz halda teziye
munbirini aylinip chiqip, wetende shehit bolghan qérindashlirimizgha bolghan
chongqur qayghulirini namayen qilishti, bu menzire etraptiki yerlik ammini
alahide jelip qildi. Shu küni shenbe bolghini üchün, meydanning etrapigha
toplanghan yerlikler we chetellik sayahetchilerning sanimu intayin köp idi.
DUQ ning bash katibi we < Yawropa Sherqiy türkistan birliki > teshkilatining
reyisi Dolqun Eysa ependi namayish jeryanida qilghan sözide, Bei jing
olimpik yighinigha del bir ay qalghan mezgilde Xitay hakimiyitining Sherqiy
türkistanda élip barghan bu qétimqi wehshi qirghinchiliqining, bu mustebit
hakimiyetning rehimsiz we gheyri insani mahiyitini pütün dunya aldida yene
bir qétim ochuq ashkarilap bergenlikini, Uyghur xelqining Xitay
hakimiyitining buxil qanliq basturushlirigha esla tiz pükmeydighanliqini we
milliy heriketlirini yenimu küchlük halda izchil dawamlashturidighanliqini
bildürdi.
Xelqara insan heqliri teshkilati Miyonhin shöbisining reyisi Yurgen Tirak
ependimu namayish jeryanida etraptiki yerlik ammigha xitaben söz qilip,
nöwette pütün dunya jama’etchilikining diqqet – étibari Bei jing olimpik
yighinigha merkezleshken bir peytte, Xitay hakimiyitining bu qétim Ürümqi we
Qeshqer rayonlirida élip barghan qanliq basturush herikitining, Xitayning
olimpikni ötküzüsh salahiyitige esla ige emslikini yene bir qétim ochuq
ispatlap bergenlikini bildürdi.
Yurgen Tirak ependi sözide yene, Xitay hakimiyitining bu qétimqi yawuz
qilmishini qattiq eyiplesh bilen birge, Sherqiy türkistan mesilisini
özlirining nöwettiki muhim hizmet küntertiplirining biri qilidighanliqini we
Xitaygha qattiq inkas qayturidighanliqini bayan qildi.
Namayish jeryanida, Xitay hakimiyitining bu qétim Ürümchi we Qeshqerlerde
élip barghan qanliq basturush herikiti bayan qilinghan teshwiqat waraqliri
etraptiki ammigha tarqitip bérildi.
Bu qétimqi namayishning neqmeydan körünishini < uygur.tv > din köreleysiz.
|
