|
Xitay Hökümiti, Yawropada Oyun Qoyup Qaytqan Uyghur Artislarni Mukapatlidii
Xitay hakimiyiti, dunya jama’etchilikining közini buyash we özlirining
Uyghur xelqighe seliwatqan zulum siyasitini pedezlesh meqsidide, 9 – aydin
étibaren Norwigiye, Shiwitsiye we Germaniye qatarliq ellerde atalmish <
Xinjiang mediniyet heptiliki > pa’aliyitini uyushturghan. Xitayning bu köz
buyamchiliqi, gherip metbu’atlirining we kishilik hoqoq tershkilatlirining
eghir tenqidige uchrapla qalmastin, Yawropa elliride yashawatqan Uyghurlarmu
türlük shekillerdin paydilinip Xitay hakimiyitining buxil saxtipezlikige
qarita qattiq naraziliq bildürgen idi.
Bundin birqanche yil burunmu Xitay hakimiyiti Kanadada yuqarqi mezmonda
pa’aliyet elip barghan, bu jeryanda ömek terkibidiki birqanche Uyghur artis
Kanadadin siyasi panahliq tilep, Xitay hakimiyitini qattiq reswa qilghan idi.
Shunga Xitay hakimiyitining bu qétimqi eng zor endishisimu, atalmish <
Xinjiang mediniyet heptiliki pa’aliyiti > üchün elip kelingen Uyghur
artislardin Kanadadikige oxshash siyasi mesilining chiqip qelishi idi.
Emma bu qétim ömek terkiwidiki Uyghur artislarning hemmisining toluq qaytip
barghanliqi, Xitay hakimiyitini qattiq söyündürgen.
< Tianshan tori > ning 10 – ayning 11 – künidiki xewiride körsütülishiche,
shu küni atalmish < aptonom rayonluq partikom > bilen, < aptonom rayonluq
xelq hökümiti > ürümqide daghdughuluq mukapatlash yighini chaqirip, bu qétim
Yawropa ellirige oyun qoyushqa kelgen Uyghur artislarni alahide
mukapatlighan.
Atalmish < Xinjian mediniyet heptiliki ömiki > ning reyisi we < aptonom
rayonluq partikom > ning mu’awin sekritari Nur Bekri bu qétimqi mukapatlash
yighinida qilghan sözide, ömek terkibidiki artislarning siyasi jehette
körsetken yüksek < sezgürliki > ge alahide teshekkür bildürgen we Uyghur
artislarning bu qétim < Xinjiangdiki chong özgürüshler > din Yawropa
ellirini toluq xewerdar qilghanliqigha yuquri baha bergen.
Bu qétimqi mukapatlash yighinigha, < aptonom rayonluq partikom > ning
sekritari Wang le quanmu qatnashqan we artislerge mukapatni öz qoli bilen
tarqitip bergen.
Yuqarqi xewerde körsütülishiche, Uyghur sen’et ömigidikiler, 9 – ayning 4 –
künidin, 10 – ayning 1 – künigiche, Norwigiye, Shiwitsiye we Germaniyede 12
meydan oyun qoyghan, 3 qetim axbarat élan qilish yighini chaqirghan, 4 qétim
kütiwelish yighini uyushturghan, ularning sen’et nomurlirini 10 mingdin
artuq kishi körgen.
Bu qétimqi atalmish < Xinjiang mediniyet heptiliki ömiki > dikiler jem’i 48
neper kishidin terkip tapqan idi.
|
