Abdujelil Qaraqash, Germaniye Metbu’atlirida Uyghurlar Heqqide Otturigha Qoyulghan Bezi Qarashlarni Keskin Ret Qildi

Buyil 9 – ayning 4 – küni kechte, Germaniye bixeterlik organliri, 9 – ayning 11 – küni Germaniyediki Amerika herbiy bazisigha we Amerikiliqlar toplushidighan jaylargha, shundaqla Frankfurt ayrupilan istansisigha bomba bilen hujum qilishni pilanlighan 3 neper terorisni qolgha chüshürgen idi.

Bu 3 neper teroristning, < Özbekistan Islam Herikiti > ning tarmiqi hésablanghan < Islami jihad > teshkilatining ezaliri ikenlikining otturigha chiqishi bilen, birqanche kündin buyan Germaniye metbu’atlirida Özbekistan we Özbekistanning Islam Kerimof hakimiyitige qarshi pa’aliyet élip bériwatqan teshkilatlar heqqide jiddi talash – tartishlar élip bérilmaqta. Bu talash – tartishlarda Uyghurlarmu tégishlik nesiwisini aldi.

Mesilen, charshenbe küni Germaniye döwlet téléwiziye qanili < ZDF > ta bu heqte bérilgen bir söhbet purogrammisida, < Özbekistan Islam Herikiti > ning bolsa El – Qayide bilen alaqisi bar bir térorist teshkilat ikenliki, ularning ghayisining, hazirqi < Xinjiang Uyghur aptonom rayoni > nimu öz ichige alghan keng Ottura Asiya rayonida < Türkistan Islam xelipiliki > ni qurup chiqishtin ibaret ikenliki otturigha qoyulghan, shundaqla Uyghur mosulmanliriningmu bu herikette yer alghanliqi bayan qilinghan idi.

Germaniyening München shehride pa’aliyet élip bériwatqan < Sherqiy Türkistan Informatsiyon Merkizi > ning reyisi Abdujelil Qaraqash, Uyghurlar heqqidiki yuqarqi qarashni keskin ret qildi we hazirgha qeder héch bir Uyghur teshkilatining < Türkistan Islam Xelipiliki > qurush pikride bolup baqmighanliqini, pütün Uyghur teshkilatlirining ghayisining peqetla Sherqiy Türkistanning musteqilliqini qolgha keltürüsh bilenla cheklengenlikini bayan qildi.

Abdujelil Qaraqash eskertip mundaq didi: < Hazir Germaniyenimu öz ichige alghan Yawropa elliride 10 din artuq Uyghur teshkilati bar, bügünge qeder héch bir Uyghur teshkilati özi turiwatqan döwletning qanunigha xilap birmu herikette bolghini yoq, Uyghur teshkilatliri yüksek bir mesuliyetchanliq tuyghusi bilen, Téroristik teshkilatlar we radikal teshkilatlar bilen bolghan chek – chégrisini éniq ayrip, Xelqara térorizimgha qarshi heriketlerge aktip masliship we uni qollap kelmekte. Uyghur teshkilatlirining buxil pozitsiyesi, Germaniye we bashqa Yawropa elliri hökümetliri we xelqining teghdirige sazawer bolup kelmekte >.

Abdujelil Qaraqash ependi tekitlep mundaq idi: < Uyghur musulmanlirining kommunist Xitay hakimiyitidin bashqa héch bir düshmini yoq, bizmu bu hakimiyetke qarshi heriketlirimizni Germaniye qanunida we xelqaraliq qayide – pirinsiplarda belgilengen demokratik usol boyiche ténchliq shekli bilen qanat yaydurup kéliwatimiz we bundin kéyinmu bu pirinsiplirimizdin esla waz kechmeymiz ! >.

Abdujelil Qaraqash ependi axirida mundaq dep körsetti: < Özbekistan islam herikiti we islami jihad teshkilatining ghayisi we meqsidi peqetla ularning özige xas, bunung Uyghur musulmanliri bilen héch bir alaqisi yoq, biz Uyghurlar özimizning ghaye – meqsetlirini musteqil halda öz aldimizgha belgilep kelduq we héch bir tashqi küchning bununggha arilishiwelishini yaki süy’istimal qilishini xalimaymiz !

Germaniyede meydangha kelgen yuqarqi hadise, xuddi German xelqighe oxshashla biznimu qattiq endishge saldi, biz Uyghurlar térorning herqandaq sheklige qet’i qarshi turimiz, shundaqla Yawropa, jümlidin Germaniyening bixeterliki we amanliqi üchün qolimizdin kélishiche tirishchanliqi körsütüshke her zaman teyyarmiz ! >.