Saudi Erebistandiki Jama’et Erbaplirimizdin Abdulla Alim Ependim Merkizimizni Ziyaret Qildi

Nöwette Saudi Erebistanning Jidde shehride yashap turiwatqan wetenperwer, teqwadar ustazlirimizdin Abdulla Alim ependi, 8 – ayning 17 – küni Germaniyediki < Sherqiy Türkistan informatsiyon Merkizi > ning ishxanisini ziyaret qilip, merkez reyisi Abdujelil Qaraqash we merkezde ishlewatqan xadimlar bilen körüshti.

Körüshüsh jeryanida Abdulla ependim, < Sherqiy Türkistan informatsiyon Merkizi > ning milliy herikitimizning tereqqiyatigha qoshqan töhpisige yuquri baha berdi, shundaqla Merkez teripidin tesis qilinghan < uygur – tv > ning nöwette chet'ellerde yashawatqan Sherqiy Türkistanliqlarning eng yéqin dostigha we uchur menbiyige aylinip qalghanliqini, bolupmu Erebistanda yashawatqan Uyghur qérindashlirimizning < uygur – tv > ning purogrammilirini nahayiti yaqturup körüwatqanliqini bayan qildi.

Abdullah ependi yene, mumkin bolsa Saudi erebistanda < uygur – tv > ning wakaletchilirini turghuzup chiqip, bu döwlette yashawatqan qérindashlirimizning ehwalidin bashqa ellerdiki qérindashlirimizni xewerdar qilish lazimliqini tekitlidi we bu jehette qolidin kélishiche yardem qilidighanliqini bildürdi.

Abdulla ependim yene, < Sheriqiy Türkistan Informatsiyon Merkizi > ning nöwette Uyghurlarning chetellerdiki eng asasliq we eng nopozluq uchur merkizige aylanghanliqini, shunga, bu merkezning xizmetlirini maddi we meniwiy jehettin qollashning bolsa, tashqi dunyada yashwatqan barliq Uyghurlarning milliy burchi ikenlikini tekitlep ötti.

Merkez reyisi Abdujelil Qaraqash ependi, Saudi Erebistandiki wetenperwer qérindashlirimizning uzun yillardin buyan chetellerdiki milliy herikitimizni maddi we meniwiy jehettin yéqindin qollap, özlirining weten – millet söygüsini namayen qilip kéliwatqanliqini, shu qatarda merkezning xizmetlirinimu maddi jehettin qollap kelgenlikini bildürdi we bu munasiwet bilen Saudi Erebistandiki barliq qérindashlargha bolghan cheksiz rehmitini we hörmitini bildüridighanliqini bayan qildi.

Abdujelil Qaraqash ependi yene, nöwette merkezning türlük xizmetlirining üzlüksiz zoruyup bériwatqanliqini, bolupmu < uygur – tv > tesis qilinghandin buyan, xelqimizning teleplirining we ehtiyajlirining barghansiri küchiyip bériwatqanliqini, shununggha mas halda merkezning iqtisadi ehtiyajliriningmu künsayin eship bériwatqanliqini eskertip ötti we muqeddes Ramazan éyi yéqinlishiwatqan shu künlerde, < uygur – tv > ni kengeytish üchün mexsus iqtisadi yardem kampaniyesi élip baridighanliqini we Saudi Erebistandiki qérindashlirimizning bu kampaniyege yéqindin mashlishidighanliqigha toluq ishinidighanliqini bayan qildi.

Abdujelil Qaraqash ependi yene Abdulla Alim ependige, merkezning xizmetliri we bundin kéyinki pilan – purogrammiliri heqqide tepsili melumat berdi.