Ottura Asiya Rehberliri Diniy Esebilikning Rayondiki Tehditini Köptürüwetken

2007.07.13 RFA

Iran mutexessisliri ottura asiya rehberlirining rayondiki diniy esebiy guruhlarning tehditini köptürüwetkenlikini bildürdi. Iran awazi radiosining mutexessislerdin neqil keltürüshiche, rayondiki döletler bir tereptin, térrorluqqa qarshi küreshni öktichi küchlerge zerbe bérishning bahanisi qilip qollinish, yene bir tereptin bu döletlerni térrorluqqa qarshi küreshtiki muhim qele qilip körsitish meqsitide, diniy esebiy guruhlarning tehditini köptürüp körsitishke tirishmaqta iken.

Iranning ottura asiya mutexessisi pirmuhemmed mullazéxi, taliban we el-qaidining tesiri küchi sherqiy we jenubiy Afghanistandiki Peshtunlar rayonida yiltiz tartqanliqini, lékin shimaliy afghanistandiki nopusning köp qisimini tajik, Özbek we Türkmenler igileydighan rayonlarda taliban tesir küchining chong emeslikini bildürgen.

Uning eskertishiche, Taliban we el-qaide teshkilatining ottura asiyadiki bezi radikal islami guruhlar bilen munaswiti barliqini inkar qilghili bolmisimu, lékin bezi Özbek we tajik jemetlirining Özbekistan islam herikiti we hizbi-tehrirge oxshash teshkilatlar bilen bolghan normal alaqisi, rayonda esebiy diniy guruhlarning tehditi kücheygenlikke pakit bolalmaydiken.

Yéqinqi yillardin béri pakistanning weziristan ülkiside yoshurunuwalghan erebler, Özbek, chéchen we hetta bir qisim azsandiki Uyghurlar bilen Pakistan armiyisi arisida qanliq toqunushlar yüz bergenliki toghrisida xewerler bérilmekte. Tajikistan we Özbekistan dölet mudapie ministirliri Shireli Heyrullayif hem Ruslan Mirzayiflar ötken ayning axirliri Qirghizistanda uchrashqanda islam esli din teriqetchilikining Ottura Asiyada küchiyiwatqanliqidin endishe qiliwatqanliqini tekitligen idi. (Erkin).