Xitay Saqchiliri Uyghur Elide Partlatquch we Qoral - Yaraqlarni Bayqighan

Radio Free Asia 2007.07.12

Aptonom rayonluq jamaet xewpsizlik nazariti bu yil 5 ‏- aydin 6 ‏- ayning 30 ‏- künigiche, aptonom rayon buyiche 938 kilogram partlatquch dora, 18 ming 318 dane kapsul, 3532 métir pilik , 48 dane qol bombisi, 217 tal miltiq , 2520 tal teqlid qilip yasalghan qoral, 19 ming pay oq hemde 9. 47 kilogram ötkür zeherlik ximiyilik buyum yighiwalghanliqini élan qildi.

Xitay axbarat wastiliri bu munasiwet bilen 11 ‏- iyul küni échilghan axbarat élan qilish yighinidin melumat bérip, jamaet xewpsizlik nazaritining aptonom rayon teweside partlatquch buyumlarni bir terep qilish, qoral - yaraqlarni yighiwélish mexsus herikitini qanat yaydurghanliqini hemde partlatquch buyumlar we qoral - yaraqlargha chétishliq qanunsiz jinayi heriketlerge qattiq zerbe bergenlikini ashkarilidi.

Dunya uyghur qurultiyining bayanatchisi dilshat réshit ependi bu heqte istansimizning ziyaritini qobul qilip, xitay dairilirining bu xil uchurlarni tarqitishta izchil türde siyasiy bir muddia buyiche ish élip bériwatqanliqini bildürdi.

Dilshat réshit ependining éytishiche, xitay dairiliri chetelliklerni uyghur élige meblegh sélishqa qiziqturushqa toghra kelgende, rayonni "bixeter, muqim we ténch "dep jar sélip teshwiq qilsa, Uyghurlarni xelqara jamaetke térrorluq heriketler bilen shughullinidighan qilip körsitishte bolsa, rayonda "her xil partlatquch dora we qoral - Yaraqlar we yer asti térrorluq teshkilatlar bayqaldi " dep teshwiq qilidiken.

Xitay jamaet xewpsizlik tarmaqliri yéqinda , eger olimpik jeryanida birer zorawanliq heriketliri meydangha kelse, uning choqum chetellerdiki uyghur teshkilatliri teripidin élip bérilish mumkinchilikining barliqini aldin qiyas qilip xelqaragha jakarlighan idi. (Eqide)