< Yawropa Sherqiy Türkistan Birliki > Teshkilatining Dala Seyliside, Rabiye Xanimning Kitabi Heqqide Seperwerlik Élip Bérildi

Öz xewirimiz: DUQ qarmighidiki < Yawropa Sherqiy Türkistan birliki > teshkilati teripidin 6 – ayning 24 – küni München shehridiki Lerchenauer See köli boyida Germaniyediki Uyghur qérindashlirimiz üchün ötküzüp bérilgen dala seyliside, meniwiy animiz we DUQ reyisi Rabiye xanimning siyasi kechürmishliri heqqide yeqinda Germaniyede neshir qilinghan kitapning tirajini we tesirini yenimu ashurush heqqide seperwerlik élip bérildi.

Bu qétimqi dala seylisi pa’aliyitige, DUQ ning bash meslihetchisi Erkin Alptekin, < Sherqiy Türkistan Informatsiyon Merkizi > ning reyisi Abdujélil Qaraqash, DUQ ning bash katibi we < Yawropa Sherqiy Türkistan Birliki > ning reyisi Dolqun Eysa, DUQ ning sabiq mu’awin reyisi Enwerjan we shundaqla Germaniyening Müncheh shehride yashawatqan köp sandiki Uyghur qérindashlar qatnashti.

Uyghurche ta’amlar hazirlanghan bu qetimqi seylide, jama’etning hemmisi bir eghizdin Rabiye xanimning < Pelektin hujum qilghuchi – Xitayning birinchi nomurluq düshmini > namliq esirini qayta – qayta mubarekleshti.

Erkin Alptekin ependi bu qetimqi pa’aliyette qilghan sözide, Rabiye xanimning pidakarliqi we japaliq emgiki netijiside nöwette milliy herikitimizning tarixta misli körülmigen derijide janlinish basquchigha qedem qoyghanliqini, Rabiye xanimning qisqighine muddet ichide milliy dawayimizning tereqqiyatini 30 yil ilgiri sürgenlikini, chet'ellerde yashawatqan barliq Uyghurlarning bu tarixiy pursetni ching tutup, Rabiye xanimning etrapigha zich uyushup, milliy herikitimiz üchün bir kishilik hesse qoshushi lazimliqini tekitlep ötti.

Dolqun Eysa ependimu qilghan sözide, DUQ ning yeqinqi pa’aliyetliri heqqide melumat bérip ötti we DUQ ning aktip we ünümlük pa’aliyetliri netijiside, Amérikidiki < Demokratiyeni ilgiri sürüsh Fonda jemiyiti > ning DUQ gha bériwatqan iqtisadi yardimini yeqinda 130 ming dollargha chiqarghanliqini eskertip ötti.

Dolqun ependi yene, Rabiye xanimning siyasi kechürmishliri bayan qilinghan Germanche kitapning neshir qilinghanliqining, Uyghurlarning milliy herikitining germaniyediki tesirini ashurushta tepilghusiz bir purset ikenlikini, shunga, Germaniyede yashawatqan her bir Uyghur qérindashlirimizning bu kitapning setilish tirajini ashurush we uni etrapidiki German dostlirigha teshwiq qilish wezipisini teshebbuskarliq bilen üstige élip, pidakarliqtin we japadin qachmay, bu heqte jiddi seperwerlik élip bérishini telep qildi.

U yene, bu kitapning peqet Rabiye xanimningla kechürmishliri bolmastin, pütün Sherqiy Türkistan xelqining ortaq kechürmishi ikenlikini, shunga qérindashlirimizning bu eserni bir < milliy eser > dep tonushi lazimliqini, Germaniyediki her bir Uyghurning eng az 10 parche kitapning setilish wezipisini öz üstige élishi lazimliqini eskertip ötti.

Abdujélil Qaraqash we Enwerjan ependilermu qilghan sözide, weten – milletning heqqi we hörmiti üchün pütün Uyghurlarning we Uyghur teshkilatlirining bir – birini qollap – quwetlep, milliy menpe’etlirimiz üchün ortaq küch serip qilishi kereklikini tekitleshti.

Abdujélil Qaraqash ependi, özlirining < Sherqiy Türkistan Informatsiyon Merkizi > bolush süpiti bilen, Rabiye xanimning kitapidin 1000 nusxini sétish we tarqitish wezipisini teshebbuskarliq bilen öz üstige alghanliqini bildürdi.