Qaraqash Nahiyeside Xitayche Yeslige Kirgenlerge Künde Bette – Polo

Xitay hökümiti, Uyghurlarni Xitaylashturush qedimini tezlitish meqsidide, ötken yildin etibaren Sherqiy Türkistanning Uyghurlar zich olturaqlashqan jenobi rayonlardiki yeza – qishlarlarda Uyghur ösmürliri üchün Xitayche yesli qurushqa bashlighan we bu yeslilerge, < qosh tilliq teyyarliq sinipi > dep isim qoyghan idi.

Xitay hökümiti bu pilanini emelge ashurushta, aldi bilen yeza kadirliri we Uyghur kompartiye ezalirigha siyasi jehettin besim we tehdit qilip, ularning öz perzentlirini Xitayche yeslilerge apirip berishini qolgha keltürse, adettiki namrat dehqanlargha qarita iqtisat bilen aldash taktikisini qollunup kelmekte.

Mesilen, < Xinjiang géziti > ning 6 – ayning 25 – künidiki xewiride körsütülishiche, Hotenning Qaraqash nahiyesi nopos jehette Sherqiy Türkistan boyiche 2 – chong nahiye bolup, bu nahiyide Xitay köchmenlirining sani intayin az bolghachqa, nahiyediki Uyghurlar ichide Xitaychini bilidighanlar nahayiti az iken, dehqanlar bolsa peqetla bilmeydiken.

Shunga Xitay hökümiti ötken yilidin hazirgha qeder 2 milyon yuandin artuq meblegh sélip, nahiye boyiche 49 Xitayche yesli ( qosh tilliq yesli ) qurup, mektep yeshigha yeqinliship qalghan 2000 din artuq dehqan balisini bu yeslilerde Xitayche terbiyileshke bashlighan.

Hökümet tarmaqliri yene, Uyghur dehqanlirini qiziqturush üchün, Xitayche yeslilerning oqutush we yataq eslihelirini adettiki milliy mekteplerge qarighanda alahide yaxshilash bilen birge, her küni yeslidiki balilarni chüshlük tamaq bilen heqsiz teminleshni yolgha qoyghan.

Yuqarqi xewerde bayan qilinishiche, chüshlük tamaqta balilargha polo, manta, leghmen … qatarliq esil tamaqlarni qilip beridiken we bundaq tamaqlarni balilar öyliridimu yiyelmeydiken.

Yeslilerde balilargha Xitayning Shandong ölkisi teripidin besip iwetip berilgen < inqilabiy she’irlar toplimi > tarqitilghan bolup, Uyghur ösmürler her küni < ittipaqliqning özi küch > digendek inqilawiy naxshilarni yadlashni ögünidiken.

Wetendin kelgen inkaslardin melum bolushiche, Xitay hökümiti hazir, < Xitayche bilmiseng istiqbaling yoq > digen idiyeni her bir Uyghurning kallisigha singdürüshke bashlighan.