Wang Lequan, < Qanunsiz Hej Qilish > ni Teshkilligüchilerge Qattiq zérbe Bérishni Telep Qildi

Xitay hakimiyitining qattiq cheklime qoyushi tüpeylidin, Sherqiy Türkistan mosulmanliri Hej qilishta tarixta körülüp baqmighan dérijide qattiq qiyinchiliqqa we siyasi bisimgha duch kélmekte. Bolupmu yeqinqi mezgillérdin buyan Xitay hakimiyitining Sherqiy Türkistan miqyasida uyghurlarning qolidiki pasaportlarni yighiwélısh hérikiti bashlighanliqi, buyil ichide Hej qilishni pilanlighan Uyghurlarning béshini qaturmaqta. Emma Xitay hakimiyiti, Uyghurlarning bashqa leniyeler arqiliq Hej qilishining aldini élısh üchün, yéngi tedbirler tüzüp chiqishqa bashlidi.

Mesilen, < Xinjiang géziti > ning 6 – ayning 19 – küni xewer qilishiche, < Aptonom rayonluq Partikom > ning sekritari Wang Lequan, mushu ayning 18 – küni Ürümqide Xitay Diniy ishlar idarisining bashliqi Yexiaowin bashchiliqidiki < birlik sep we diniy xizmet tekshürüsh ömiki > bilen körüshkende qilghan sözide, < Hej qilish xizmitige bolghan bashqurushni alahide kücheytish bilen birge, kishilerni qanunsiz Hej qilishqa teshkilligüchilerge qattiq zérbe bérish kerek > dep körsetken.

< Wang molla > yene, bay bolup Hej qilmaqchi bolghanlargha qarita inchikilep idiyewiy xizmet ishlesh kérekligini, ularni Hej qilishtin waz kechip, etrapidiki namratlargha yardem bérishke, sawapliq ishlarni qilishqa, özining turmush sewiyesini yuquri kötürüp, güzel ayile bérpa qilishqa yüzlendürüsh lazimliqini tekitligen.

Yuqarqi xewerde körsütülishiche, Xitay diniy ishlar idarisining bashliqi Yexiaowin bashchiliqidiki hey’et yeqinda Aqsu, Ghulja, Qeshqer qatarliq jaylargha bérip, shu jaylarning diniy xizmet ehwali heqqide tekshürüsh élıp baridiken.

Bu xewerde yene, Xitay merkizi hökümitining, Uyghurlarning hej qilish ishigha jiddi türde diqqet qiliwatqanliqi bayan qilinghan..