|
Xitayning Ichki Ölkiliride Ishlewatqan Roshengülning Hikayisi
< Xinjiang xelq radio istansisi > ning 6 – ayning 18 – künidiki xewiride
körsütülishiche, yeqinda mezkur Radio istansisining alahide teklip qilinghan
muxpiri Sunjianzhung, Xitayning Tianjin, Shandong, Zhejiang qatarliq
ölkiliridiki 10 nechche karxanigha berip, buyerde ishlewatqan Uyghur
qizlirini ziyaret qilghan.
Xitay muxpirining ziyaret xatiriside, Zhejiangning Haiyan Huaxun Balilar
oyunchuqi hessidarliq shirkitide ishlewatqan Roshelgül isimlik Uyghur
qizining kechürmishlirige yer berilgen bolup, unung Xitay muxpirigha bayan
qilishiche, buyil 21 yashqa kirgen Roshengül, Qeshqer Peyziwat nahiyesidiki
bir dehqan ayilisining qizi bolup, buyerge kélip ishlewatqili bir yil boptu,
unung ata – anisi yashinip qalghan bolup, ayilisi nahayiti namrat iken,
ayilisidiki 5 jan pütünley dehqanchiliqqa tayinip hayat kechüridiken, shunga
ayilisini qutquzush meqsidide Zhejianggha ishligili keptu.
Xitay muxpiri yene Sherqiy Türkistangha kélip, Peyziwat nahiyesining Shaptul
yézisigha bérip, Roshengülning dadisi Qadir Zunun bilen körüshken, Qadir
Zunun muxpirgha, < qizim iwetken pul bilen öyimizni yer tewreshke chidapliq
qilip qayta yasatmaqchimiz, ilgiri men balilirimni mektepke bergende,
bashqilardin qeriz élip ularning oqush chiqimini töleyttim, hazir qizim
iwetken pul bilen qerizlirimni tölewatimen > dep jawap bergen.
Yuqarqi xewerde, Peyziwat nahiyesining döwlet teripidin < eng namrat nahiye
> dep bekitilgen nahiyelerning biri ikenliki tekitlengen bolup, nahiyening
hakimi Niyaz Hashimning Xitay muxpirgha bildürishiche, 2005 – yilidin buyan
Nahiyedin Xitayning Tianjin, Hebei, Beijing, Zhejiang … qatarliq jayliridiki
karxanilargha 5000 din artuq kishi ishlemchilikke iwetilgen, Roshengül
ishlewatqan Zhejiangdiki zawutqa 2006 – yili 4 – ayda 200 neper Uyghur qizi
iwetilgen.
Nöwette Sherqiy Türkistanning jenobi rayonliridiki 16 yashtin yuquri qizi
bar dehqan ayililirining hemmisige bir neper qizini Xitayning ichki
ölkilirige ishlemchilikke iwetish wezipisi tapshurulghan bolup, eger
hökümetning bu belgilimisige xilapliq qilghuchilar iqtisadi jehettin eghir
derijide jazagha tartilidu, hökümet xadimi yaki emeldar bolsa wezipisidin
élip tashlinidu.
|
