|
Yekendin Xitaygha Qachurup Kétilgen 11 Yashliq Perhat Ürümqige Qéchip Keldi
< Tianshan tori > ning 6 – ayning 14 – küni xewer qilishiche, buyil 4 –
ayning 12 – küni Yeken nahiyeside Perhat isimlik 11 yashliq bir Uyghur bala
öyining aldida oynawatqanda, ikki natunush kishi kélip unungdin yol sorighan
bolup, dora chilanghan yaghliq bilen unung eghizini tosup
hushsizlandurghandin kéyin, awal uni nahiye bazirigha élip bérip solap
qoyghan. Aridin 5 kün ötkendin kéyin héliqi ikki mexluq Perhatni qorqutup
poyez bilen Nanjin shehrige élip ketken.
Nanjindiki bir kichik öyde melum bir < qoshun > gha qaraydighan yashliri
Perhat bilen periqlenmeydighan 20 nechche Uyghur bala solanghan bolup,
karwat bolmighachqa, kechte hemmisi daq yerde üstige bir eski ediyalni yépip
yatidiken, bu balilar 3 guruppigha bölüngen bolup, her gurupqa chonglardin
birsi qaranchuqluq qilidiken we balilargha oghruluq we yanchuqchiliqning
texnikilirini ögütidiken.
Her küni seher 4 lerde bir munapiq balilarni bazargha oghruluqqa sélishqa
élip chiqidiken, kechte 10 da qayturup kélidiken, her bir balining künige
2000 yuan oghrilishi wezipe qilinghan bolup, wezipisini orundighanlarni
uxlighili qoyidiken, wezipisini orundiyalmighanlarni ach we uyqusiz qoyup,
qamcha bilen sawaydiken.
Yekenlik perhat Nanjinge barghanning 4 – küni Qaraqchilar uni musteqil halda
yanchuqchiliq qilishqa qistighan, wezipini orundiyalmighachqa, herküni
qamcha yigen, 5 – ayning 3 – küni oghrilarning béshi uni bazardin tamaka
élip kélishke buyrighanda, udul Nanjin poyez istansisigha bérip poyez bilen
Ürümqige qechip kelgen.
Ürümqige kelgende yenida puli yoq, unung üstige Ürümqigimu natonush bolghini
üchün, kochilarda botulka we qeghez terip sétip jenini baqqan.
6 – ayning 8 – küni Enwer isimlik bir amanliq xadimi uni öyige élip kétip
turghuzghan we yurtigha téléfun qilghan.
6 – ayning 12 – küni Perhatning apisi Ürümqige yétip kélip oghli bilen
uchrashqan.
Gerche yuqarqi xewerde, Perhatni élip qachqan oghrilarning isim – familisi
tilgha élinmighan bolsimu, emma, ichkiride < qoshun > quriwalghanlarning
hemmisining digüdek Uyghur ikenliki, bu munapiqlarning köpünchisining imani,
wijdani yoq, rehimsiz we qara yürek bolup, künini zeherlik chékimlik chékish
bilen ötküzidiken.
|
