Sherqiy Türkistandiki Milliy Ottura – Bashlanghuch Mekteplerde < Bölgünchilik > ke Qarshi Turush Terbiyesi Kücheytilmekchi

< Xinjiang géziti > we < Xinjiang xelq radio istansisi > ning 6 – ayning 10 – künidiki xewiride körsütülishiche, Xitay hökümiti, atalmish < düshmen küchler > ning Sherqiy Türkistandiki milliy ottura mektep oqughuchilirini özlirige mayil qiliwélishining aldini élish üchün, pütün milliy ottura – bashlanghuh mekteplerge seplengen atalmish <exlaq terbiyesi oqutquchiliri> arqiliq, milliy oqughuchilargha qarita < bölgünchilik > ke qarshi turup, < wetenning birlikini qoghdash > terbiyesini omomiy yüzlük qanat yaydurushqa hazirlanghan.

< Aptonom rayon > ning reyisi Ismayil Tiliwaldi, 6 – ayning 9 – küni Ürümchide chaqirilghan, < aptonom rayonluq 13 – qararliq ottura – bashlanghuch mektep exlaq terbiyesi tayanch küchlirini terbiyilesh kursi > da qilghan sözide, milliy ottura mekteplerning idiyewiy terbiye xizmitide bezi ajiz halqilarning saqliniwatanliqini eskertip ötkendin kéyin, < aptonom rayonimizda düshmen küchler herxil shekillerdin paydilinip, yash –ösmürlirimizni qaymuqturiwatidu > dep körsetken.

Ismayil Tiliwaldi yene, < aptonom rayonimizda ottura – bashlanghuch mektep exlaq terbiye tayanch küchlirini terbiyilesh pa’aliyitini qanat yaydurushtiki meqset, ma’arip systimisining bölgünchilikke we bölgünchilerning qaymuqturushigha qarshi küresh weziyitining teqezzasi, shunga, mekteplerning muqimliq xizmitini kücheytip, sotsiyalizim ishliri üchün ishenchlik izbasarlarni terbiyilep chiqishimiz lazim > dep bayan qilghan.

Yuqarqi xewerde körsütülishiche, nöwette Sherqiy Türkistandiki her derijilik mekteplerning sani 8345 bolup, oqughuchilarning sani 4 milyon 465 ming neper, bunung ichide < azsanliq millet > oqughuchiliri 57.4 pirsentini teshkil qilidu.

Yéqinqi yillardin buyan Xitay hakimiyiti Sherqiy Türkistandiki milliy mekteplerni Xitylashturush qedimini tezlitish bilen birge, milliy oqutquchi we oqughuchilargha qaratqan siyasi besiminimu üzlüksiz ashurup kelmekte.