|
Germaniyediki Uyghur Ayalliri < Dunya Anilar Küni > ni Tebriklidi
Öz xewirimiz: 5 – ayning 11 – küni, Germaniyede yashawatqan Uyghur ayalliri,
Birleshken döwletler teshkilati teripidin bekitilgen < Dunya anilar küni >
munasiwiti bilen München shehridiki bir zalgha toplunup, bir – birining
bayrimini tebrikleshti.
< Yawropa Sherqiy Türkistan Biriliki > teshkilati teripidin uyushturulghan
buqétimqi tebriklesh pa’aliyitige, Germaniyede yashawatqan köp sandiki Uyhur
xanim – qizliri qatnashti.
Pa’aliyet jeryanida xanim – qizlirimiz, weten ichi we sirtidiki Uyghur xanim
– qizlirigha bolghan güzel tileklirini, seghinishliri izhar qilishti.
Ular yene, herqaysi ellerde yashawatqan Uyghur ayalliri otturisidiki diyalog
we dostluq munasiwetlirini yenimu kücheytish, yushurun küchlerni oturigha
chiqirish, chetellerde yashawatqan ayallirimizning milliy herikitimizge
qatnishish aktipchanliqini yeni kücheytish … qatarliq keng mezmonlarda
muhakime élip bardi.
Bu qétimqi tebriklesh pa’aliyiti jeryanida yene, Yéqinda Amerikidiki <
Demokratiye we kishilik hoqoqni ilgiri sürüsh fonda jemiyiti > teripidin
uyushturulghan we meniwiy animiz Rabiye xanim biwaste riyasetchilik qilghan,
< Uyghur ayallirini demokratiye we kishilik hoqoq boyiche terbiyilesh kursi
> gha qatniship qaytip kelgen Amalgül Eziz xanim, yighinning mezmoni heqqide
tepsili melumat berip ötti.
Bashqa xanimlarmu tebriklesh yighinida qilghan sözliride, nöwette mustebit
Xitay hakimiyitining Sherqiy Türkistan ayallirigha qarita sestimiliq halda
atsimilatsiye qilip yoqutush siyasitini yürgüzüp kéliwatqanliqini, <
pilanliq tughut > digenni bahane qilip, ulargha jismani we rohiy jehettin
ziyankeshlik qilip kéliwatqanliqini, Uyghur qizlirini mejburi halda türküm –
türkümlep Xitayning ichki ölkilirige apirip Xitay hojayinlirigha malayliqqa
tutup beriwatqanliqini, Xitayning chekidin ashqan zulmi tüpeylidin bügün
Uyghur ayallirining tarixta misli körülüp baqmighan derijide éghir xorluq we
azap – oqubet ichide jan talishiwatqanliqini, shunga, erkin dunyada
yashawatqan Uyghur ayallirining özliri turiwatqan döwletlerdiki Uyghur
teshkilatlirining etrapigha téximu zich uyushup, milliy ghurorini kücheytip,
weten ichide xorluq chekiwatqan Uyghur ayallirining hörlüki we azatliqi
üchün bir kishilik hesse qoshushi lazimliqini tekitleshti.
Pa’aliyet axirigha Uyghur ayalliri naxsha éytip, usol oynap, özlirining
wetenge bolghan seghinishlirini ipade qilishti..
|
