|
Uyghur Qizlirini Xitaygha Tutup Bérishte Xizmet Körsetken Yüsüpjan Turghun,
< 4 – May Emgek Médali > gha Érishti
< Tianshan Tori > ning 5 – ayning 4 – küni xewer qilishiche, Qeshqer
Konisheher nahiyélik ittipaq komutétining sekritari Yüsüpjan Turghun, Uyghur
déhqan qizlirini Xitayning ichki ölkilirige bérip ishleshke seperwer
qilishta xizmet körsetkini üchün, buyilliq < 4 – may emgek medali > gha
érishken.
Yuqarqi xewerde körsütülishiche, Qeshqer Konasheherde < solamqi > dep dangqi
chiqqan bu Yüsüpjan Turghun, hazirmu Uyghur qizlirini Xitaygha bérip <
igilik tiklesh > ke qayil qilish xizmiti bilen meshghul iken.
Ötken yili Yüsüpjanning alahide küch chiqirishi bilen, Qeshqer Konasheherdin
tunji bolup 150 Uyghur déhqan qizi Xitayning Tianjin shehridiki bir zawutqa
ishleshke iwetilgen bolup, bu qizlarning köpünchisi hetta poyeznimu körüp
baqmighan iken.
Yüsüpjanning muxpirlargha bildürishiche, ötken yili Nahiye boyiche Uyghur
déhqan qizlirini Xitayning ichki ölkilirige bérip ishleshke chaqirip
seperwerlik élip barghanda, yerlik déhqanlarning qattiq naraziliqigha
uchrighan, ular, < qizlirimiz ichkiri ölkilerde haram nersilerni yep qoysa
qandaq qilimiz ? bashqilar aldap élip qachsa yaki ishlitip pülini bermise
qandaq qilimiz ? > digendek so’allarni sorap, özlirining endishilirini
bildürgen, bu chaghda Yüsüpjan Turghun déhqan ayililirige idiyewiy xizmet
ishlep, ularni qayil qilish arqiliq, 150 neper Uyghur qizning Xitaygha
bérishini qolgha keltürgenmish we ötken yili 7 – ayda qizlarni özi bashlap
élip barghanmish.
Mezkur xewerde körsütülishiche, Uyghur qizliri Tianjinge barghandin keyin,
hawasigha we turmush adetlirige könelmey qattiq qiynalghanmish, her küni
digüdek birqanche qiz aghrip yétip qalidiken, bundaq chaghlarda Yüsüpjan
Turdi qizlargha terjimanliq qilip bérip, kesel bolup qalghanlarning halidin
xewer élip, ularni asta – asta rélisqa salghanmish, netijide qizlar yaxshi
ishlep, ayda 1200 yuan kirim qilghan we ularning ayliq kirimi, Qeshqer
Konasheher nahiyesidiki déhqanlarning bir yilliq kirimige toghra kelgenmish.
Yüsüpjan Turdi, Xitaygha ishligili élip barghan qizlardiki ajayip <
tereqqiyat > lar heqqide melumat bérip, < qizlirimiz deslepte ichkirige
kelgende, kiyim – kéchekliri retsiz we qalaq idi, ular buyerde 8 ay turush
arqiliq, xuddi sheher qizliridek köp tereqqi qildi, hazir ular niuzai ishtan
( padichilar ishtini ) we sipta ishtanlarni kiyidu, Xenzuche sözliyeleydu, 8
qizimiz qol telefuni aldi > dep aghzi – aghzigha tegmey maxtinip ketken.
Yüsüpjanning bildürishiche, hazir u 2 – türkümdiki qizlarni Xitaygha yolgha
sélish üchün jiddi tirishiwetiptu.
.
|
