Xitay Hökümiti Ürümqi Liudawan Kömür Kenini Taqimaqchi

Ürümqidiki Liudawan kömür keni, Sherqiy Türkistanda eng burun echilghan we ishlepchiqirish miqdari eng yuquri kömür kanlarning biri bolup, bu kanda ishleydighan Uyghurlarning sanimu xélila köp.

< Mediniyet inqilawi > mezgilliride, Xitay hakimiyiti Liudawan kömür kenini atalmish < pantürkisizimchi > we < panismizimchi > larni jazalaydighan lagirgha aylanduriwalghan, Uyghur xelqighe tonushluq bolghan atghliq Uyghur ölimalar we pishqedem Uyghur ziyaliliri bu kömür kangha solunup künige 18 sa’etlep mejburi ishlitilgen web u jeryanda xéli köp Uyghur mehbuslar kann astida hayatliridin ayrilghan idi. Shung Liudawan kömür kenining Sherqiy Türkistanda xéli dangqi bar.

< Tianshan tori > ning 5 – ayning 1 – küni xewer qilishiche, Xitay hökümiti, 57 yilliq tarixqa ige bu kömür kanni mushu yilning axirghiche tamamen taqiwétishni qarar qilghan.
Taqiwétishning sewebi bolsa, bu kömür kanning qezish kölimi 4 kuwadirat kilométirgha yetken bolup, kanning bir uchi Ürümqi shehridiki Nahu kochisigha peqetla 200 métir qalghan.

Pilansiz kömür qezish sewebidin Ürümqi shehrining asti hötme – töshük qilinghan bolup, bu, Ürümqining shehr qurulushigha we kéngiyishige jiddi tesir körsetken. Shunga, buyil 4 – ayning 17 – küni < aptonom rayonluq partikom > bilen < aptonom rayonluq xelq hokümiti > birlikte Liudawan kömür kenini taqiwétish heqqide ortaq qarar alghan.

Hazir bu kömür kanda ishlepchiqirish tamamen toxtutulghan bolup, 5 – ayning 20 – künige qeder kandiki qezish üsküniliri pütünley élip kétilidiken we yilning axirigha qeder tamamen taqilidiken.

Liudawan kömür keni taqalghandin kéyin, bu kanda ishleydighan Uyghur ishchilarning teqdirining qandaq boludighanliqi, Ürümqide yashawatqan Uyghurlarni qiziqturidighan jiddi mesililerning birige aylanghan.
.