Türkiyening Sabiq Ediliye Ministiri Shewket Qazan, < Sherqiy Türkistan Informatsiyopn Merkizi > ni Ziyaret Qildi

Öz xewirimiz: Türkiye jumhuriyitining sabiq ediliye ministiri, sabiq Parlament ezasi we Türkiye < Sa’adet Partiyesi > ning mu’awin reyisi Shewket Qazan ependi 4 – ayning 20 – küni chüshtin kéyin, Germaniyening München shehridiki < Sherqiy Türkistan informatsiyon merkizi > ning ish’xanisini ziyaret qilip, merkez reyisi Abdujélil Qaraqash ependidin Sherqiy Türkistanning nöwettiki siyasi weziyiti heqqide melumat aldi.

Yawropadiki eng chong Türk we Islamiy teshkilat hisaplanghan we Yawropada 200 mingdin artuq ezasi bolghan < Milliy Görüsh Teshkilati > ning München shehridiki bir qisim rehberlirimu bu qétimqi ziyarette birge boldi.

Shewket Qazan ependi Türkiyede tesiri bir qeder chong bolghan mesh’hur siyasi shexislerning biri bolup, uzun yillar Türkiye parlamentining ezasi bolghan we eyni chaghda Türkiyediki < Refah partiyesi > bilen Toghrayol partiyesi > teripidin qurulghan birleshme hökümet jeryanida, bu hökümetning Ediliye ministiri bolghan idi.

Bu qetimqi ziyaret jeryanida, < Sherqiy Türkistan informatsiyon merkizi > ning reyisi Abdujélil Qaraqash ependi Shewket Qazan bashchiliqidiki hey’etke, Sherqiy Türkistanning nöwettiki omomiy weziyiti, Xitay hakimiyitining yéqinda milliy rehbirimiz Rabiye xanimning oghli Ablikim Abdurehim bilen, Kanada puxrasi we Uyghur siyasi pa’aliyetchi Hüseyin Jélillarning Xitay sot mehkimiliri teripidin jazagha höküm qilinghanliq ehwali, shundaqla < Sherqiy Türkistan informatsiyon merkizi > ning Xitay hakimiyitige qarshi élip beriwatqan pa’aliyetliri heqqide tepsili melumat berip ötti.

Abdujélil Qaraqash ependi ulargha qilghan sözide, Türkiye < Sa’adet Partiyesi > we < Milliy Görüsh Teshkilati > din, Ablikim Abdurehim we Hüsenjan Jélil mesilisige alahide köngül bölüshni we Xitay mustemlikichilirining ulargha qaratqan nomussizlarche ziyankeshlikige qarita tegishlik inkas qayturushni telep qildi.

Shewket Qazan ependi ziyaret jeryanida qilghan sözide, özlirining Sherqiy Türkistandiki qan qérindashlirining heqliq dawasigha bashtin – axir izchil türde hesdashliq qilip kelgenlikini, Sherqiy Türkistan mesilisini, Türkiye < Sa’adet partiyesi > bilen < Yawrops milliy körüsh teshkilati > ning xizmetlirining asasliq küntertibige kirgüzüp kéliwatqanliqini qayta eskertip ötüsh bilen birge, eger bundin kéyin özlirining saylamda ghelibe qilip, Türkiyede qaytidin hakimiyet béshigha chiqqan teghdirde, Sherqiy Türkistan mesilisini Türkiye jumhuriyitining we parlamentining mohim küntertiplirining birige aylanduridighanliqini bayan qildi.

Shewket Qazan ependi eskertip mundaq didi: < ilgiri biz hakimiyet béshigha chiqqan waqtimizda, Xitay hökümitini Sherqiy Türkistandiki qérindashlirimizgha zulum salmasliq heqqide köp qetim agahlandurghan, hetta Xitay hökümiti bizning partiyemizdin bolghan parlament ezalirini Xitaygha ziyaretke teklip qilghanda, ularning ana wetinimiz Sherqiy Türkistannimu ziyaret qilishqa ruxset qilish heqqide Xitaygha shert qoshqan, shu seweptin bizning Xitayni ziyaret qilghan birqanche parlament ezayimiz Sherqiy Türkistanghimu barghan idi. Hetta biz eyni chaghda Türkiye parlamentida Xitayning Uyghur qérindashlirimizgha séliwatqan zulumlirini eyiplep imza toplash herikiti élip barghan iduq, diken biz Uyghur qérindashlirimizgha quruq gep bilen emes, belki emiliy herikitimiz arqiliq hesdashliq qilip kéliwatimiz >.

< Sherqiy Türkistan infotmatsiyon merkizi > ning reyisi Abdujélil Qaraqash ependi qilghan sözide, nöwette köp sandiki Türk we Islam ellirining Xitaydin iqtisadi jehettin nep élishgha berilip ketip, Xitay hakimiyitining Sherqiy Türkistan mosulmanlirigha séliwatqan chekidin ashqan zulmigha süküt qilip turiwatqanliqini, hetta bezi ellerning Xitay bilen eghiz – burun yaliship, Uyghur musulmanlirigha ziyankeshlik qiliwatqanliqini, mesilen, yéqinda Xitay soti teripidin muddetsiz qamaq jazasigha höküm qilinghan Hüseyin Jélilning Özbekistan teripidin tutqun qilinip Xitaygha ötküzüp bérilgenlikini eskertip ötti...