Xitay Hökümiti Buyil Ichki Ölkilerge Iwetilidighan 10 Ming Déhqan Yashni Xitayche Kurslardin Ötküzmekchi

Nöwette Xitay hakimiyiti pütün küchini Sherqiy Türkistanning yéza – qishlaqliridiki Uyghur yashlirini atsimilatsiye qilish siyasitige qaratmaqta we ghayet zor meblegh ajritip, Jenobi rayonlardiki yézilarda Uyghur déhqanliri üchün mexsus Xitayche kurslarni tesis qilmaqta.

< Tianshan tori > ning 4 – ayning 17 – küni xewer qilishiche, Xitay hökümiti buyil ichide Sherqiy Türkistanning jenobi rayonliridiki yézilarda Xitayche ögünidighan 200 kurs tesis qilip, bu kurslarda 10 ming déhqan yashni terbiyilep chiqidiken we kurslarni püttürgen Uyghur yashliri Xitayning ichki ölkilirige ishlemchilikke iwetilidiken.

Yuqarqi xewerde körsütülishiche, 4 – ayning 12 – küni Aqsuning Üchturpan nahiyéside, < aptonom rayonluq yéza yashlirini qosh tilliq terbiyilesh neqmeydan yighini > chaqirilghan bolup, Üchturpan nahiyési Sherqiy Türkistan boyiche eshincha emgek küchlirini Xitayning ichki ölkilirige we bashqa yurtlargha yötkeshtiki nuxtuluq nahiyilerning biri iken.

< Döwlet derijilik namrat nahiye > digen unwangha érishken Üchturpan nahiyésidin 50 ming déhqan bashqa yurtlargha ishleshke iwetilidiken. Yézilardiki Xitayche kurslarni püttürgen 106 neper Uyghur qizi aldi bilen buyil 6 – ayda Xitayning Jiang Su we Shan Dong ölkilirige yolgha sélinidiken.