Hoten Wilayitidin Yiligha Bashqa Yurtlargha Medikarchiliqqa Yolgha Sélinghanlarning Sani 200 Ming Adem Qétimdin Ashidu

< Hoten geziti > ning 4 – ayning 11 – küni xewer qilishiche, bundin kéyin Hoten wilayitidiki her derijilik hökümet tarmaqliri, < éshincha amgek küchlirini bashqa yurtlargha yüzlendürüsh > digen namda yerlik déhqanlarni öz yurtliridin sürgün qilishni asasliq xizmet nishani qilidiken.

Mezkur xewerde körsütülishiche, peqet ötken yili ichidila Hoten wilayitidin bashqa yurtlargha medikarchiliqqa chiqqanlarning sani 236 ming 900 adem qétimgha yetken.
2007 – yili bolsa sirtqa yollinidighan yerliklerning sani 250 ming adem qétimgha, < 11 – besh yilliq pilan > mezgilide bolsa 350 ming adem qétimgha yetküzilidiken.

Mezkur xewerde körsütülishiche, nöwette Hotendiki yerlik déhqanlarning kishi beshigha toghra kélidighan yilliq kirimi 1499 yuan etrapida bolup, Hotendin Bing tuanning herqaysi dewiziyélirige bérip ishlewatqan yerlik déhqanlarning sanimu xéli köp iken.

Wetendin kelgen bezi inkaslardin qarighanda, Xitay hakimiyiti türlük bahane – sewepler bilen Hotenning yerlik xelqini bashqa yurtlargha sürgün qiliwatqan yéqinqi yillardin buyan, Hotende Xitay köchmenlirining sani körünerlik derijide éshishqa bashlighan. Xitayning ichki ölkiliridin ish izdep kelgen Xitay aqqunliriningmu sani köp iken.

Hazir Hotenning chet yéza – qishlaqliridimu Xitay köchmenliri peyda bolushqa bashlighan we bu Xitay aqqunliri yerlik hökümetlerning türlük étibar bérish siyasetliridin behriman bolidiken.