Xitay Hakimiyiti, Qeshqer, Atush we Hoten Wilayetliridin Bir Milyon Yerlik Déhqanni Sirtqa Yötkeshni Pilanlimaqta

< Xin hua axbarat tori > ning 4 – ayning 7 – küni xewer qilishiche, buyildin étibaren Sherqiy türkistanning jenobidiki Qeshqer, Atush we Hoten wilayetliridiki yerlik déhqanlarning heqsiz halda Xitayche ögünüshi üchün keng kölemde meblegh sélinidiken we bu wilayetlerdiki yerlik déhqanlarning Xitayning ichki ölkilirige berip ishlishi üchün omomiy yüzlük seperwerlik élip berilidiken.

Peqet Qeshqer wilayitining özila her yili Uyghur déhqanlirining Xitayche ögünüshi üchün 30 milyon yuan meblegh salidiken we herqaysi yézilarda Xitayche kurslarni tesis qilip, yeza yashlirining heqsiz halda Xitayche ögünishi üchün sharayit hazirlaydiken.

Yuqarqi xewerde yene Qeshqerning yéziliridin Xitayning ichki ölkilirige berip ishlep ayilisini bay qilghan Aygül isimlik bir Uyghur qizining kechürmishlirige yer berilgen bolup, hazir Qeshqerning yéziliridiki köpligen Uyghur déhqanlirining en – eniwiy qarashlirida özgürüsh bolup, Xitayning ichki ölkilirige berip ishleshni aktipliq bilen telep qiliwatqanliqi bayan qilinghan.

Mezkur xewerde yene, nöwette Qeshqer, Atush we Hoten qatarliq 3 wilayetning yézilirida bir milyondin artuq eshincha emgek küchining barliqi, bu wilayetlerning tebiy mohiti intayin nachar bolghachqa, déhqanlarning nahayiti namratliq ichide yashawatqanliqi, köpligen ayililerning kishi beshigha toghra kélidighan yilliq kirimining 1000 yuangimu barmaydighanliqi, shunga hökümet tarmaqlirining aldimizdiki 3 – 5 yil ichide bu wilayetlerdiki her bir hedqan ayilisidin bir kishining sirtqa berip ishlishini emelge ashurushni pilanlighanliqi bayan qilinghan.