Herqaysi Ellerde Barin Inqilabining 17 – yilliqi Xatirilendi

<Öz xewirimiz: Dunyaning herqaysi elliride pa’aliyet élip bériwatqan Uyghur teshkilatliri, Sherqiy Türkistan milliy musteqilliq kürishining simowuligha aylanghan Barin inqilabining 17 – yilliqini türlük shekiller bilen dang’dughuluq halda xatirilidi.

Amerikida

< Dunya Uyghur Qurultiyi > ning reyisi we Uyghurlarning meniwiy anisi Rabiye Qadir xanim 4 – ayning 5 – küni Barin inqilabining 17 – yilliqi munasiwiti bilen elan qilghan axbaratida, < Barin Inqilawi, Sherqiy Türkistan xelqining Xitay hakimiyitige texi bash egmigenlikini ispatlidi. Bu inqilapqa özini atighan qehriman shihidlirimizning mubarek issiq qéni Sherqiy Türkistan xelqining azadliq, musteqilliq, insaniyetke has insaniy yashash istek we arzusigha türtke boldi. Xelqqe yéngi roh, ümit ata qildi > dep körsetti we chetellerde pa’aliyet élip bériwatqan Uyghur teshkilatlirini Barin shehidlirining qehrimanliq ish – izlirini her zaman yad étip turushqa hem ularning jeng’giwar iradisige warisliq qilishzqa chaqirdi.
Amerikidiki < Erkin asiya radiosi > ning Uyghurche bölümimu Barin inqilabining 17 – yilliqi munasiwiti bilen mexsus purogrammilarni uyushturup, Barin inqilawining sewebi we jeryani heqqide etirapliq melumat berdi.


Germaniyede

4 – ayning 1 – küni kechte, < Sherqiy Türkistan informatsiyon merkizi > bilen < Yaropa Sherqiy Türkistan birliki > teshkilati birlikte Miyonhin shehridiki Dunya Uyghur Qurultiyi ishxanisida Barin inqilabining 17 – yilliqini xatirilesh pa’aliyiti ötküzdi.

Shu küni yene qurultay qarmighidiki < Alptekin Uyghur ösmürliri telim – terbiye merkizi > dimu oqughuchilargha Barin inqilawi heqqide tepsili melumat bérip ötüldi.
< Sherqiy Türkistan informatsiyon merkizi > teripidin tesis qilinghan < uygur – tv > mu Barin inqilawining 17 – yilliqi munasiwiti bilen mexsus purogramma hazirlap chiqip, 4 – ayning 5 – küni internet arqiliq dunyagha elan qildi.

Qazaqistanda

4 – ayning 5 – küni, Dunya Uyghur Qurultiyining mu’awin reyisi Qehriman Ghujamberdi ependining riyasetchilikide Qazaqistanning Almata shehridiki Uyghur jama’itimu Barin inqilawining 17 – yilliqini xatirilidi. Bu pa’aliyetke birleshtürülüp yene Sherqiy Türkistan milliy armiyesining qurulghanliqining 62 – yilliqimu xatirilendi. Xatirilesh yighinigha, Sherqiy Türkistan milliy armiyesining bir qisim peshqedem ofisserlirimu teklip qilindi.

Qirghizistanda

4 – ayning 5 – küni, Dunya Uyghur Qurultiyi qarmighidiki < Qirghizistan Uyghur Ittipaq jemiyiti > mu Bish’kek shehride mexsus pa’aliyet teshkillep, Barin inqilabining 17 – yilliqini xatirilidi. Xatirilesh pa’aliyitige 100 din artuq kishi qatnashti.

Türkiyede

4 – ayning 5 – küni, Türkiyede pa’aliyet élip bériwatqan < Sherqiy Türkistan ma’arip we hemkarliq jemiyiti > bilen < Sherqiy Türkistan mediniyet we hemkarliq jemiyiti > teripidin Istanbul we Qeysiri sheherliride mexsus Barin inqilabining 17 – yilliqini xatirilesh pa’aliyetliri uyushturuldi.

Istanbulda ötküzülgen xatirilesh yighinigha, eyni chaghda Barin inqilabigha qatnashqan bezi Ghazilar, shundaqla Istanbulda yashawatqan Uyghurlardin bolup köp sanda kishi qatnashti. Yighinda Barin shehidlirining rohigha atap Qurani – kérim we du’alar oquldi, shundaqla Barin qehrimanlirigha atap yézilghan she’irlar deklimatsiye qilindi.

Qeysiride neshir qiliniwatqan < Istiqlal > gézitining yetekchilikidimu yene Barin inqilabining 17 – yilliqini xatirilesh yüzisidin bir qatar pa’aliyetler uyushturuldi.

Yuqarqilardin bashqa yene herqaysi ellerde pa’aliyet élip bériwatqan Uyghur teshkilatliri we Uyghur jama’etlirimu ox’shimighan shekiller arqiliq Barin inqilabining 17 – yilliqini xatirilep, özlirining Barin oghlanlirigha bolghan hörmiti we seghinishlirini ipade qilishti.
Barin inqilabi yüz bergen 1990 – yili 4 – ayning 5 – künidin buyan, chetellerde pa’aliyet élip bériwatqan Uyghur teshkilatliri her yili bu heriketni xatirileshni adetke aylandurup kelmekte
.