Germaniyede Peyghembirimiz Hezriti Muhammetning Tughulghan Küni we Barin Inqilibining 17 – Yilliqi Xatirilendi

Öz xewirimiz: 4 – ayning 1 – küni kechte, < Dunya Uyghur Qurultiyi > merkizi orgini, < Sherqiy Türkistan Informatsiyon merkizi > we Qurultay qarmighidiki < Yawropa Sherqiy Türkistan birliki > qatarliq teshkilatlar birlikte München sehridiki qurultay ishxanisida, söyümlük peyghembirimiz hezriti Muhammetning tughulghanliqining 1436 – yilliqini we 1990 – yili 4 – ayning 5 – küni Sherqiy Türkistanda yüz bergen Barin inqilawining 17 – yilliqini xatirilidi.

Xatirilesh pa’aliyitige, < Dunya Uyghur Qurultiyi > Diniy ishlar komutétining mu’awin reyisi Alimjan riyasetchilik qildi.

Pa’aliyetning beshida aldi bilen, wetinining azatliqi we xelqining erkinliki yolida Xitay mustemlikichilirige qarshi baturane küresh qilghan, shundaqla özlirining qimmetlik hayati we issiq qanliri bedilige weten ichi we sirtidiki milliy musteqilliq herikitimizge janlinish bexish etken Barin shehidlirimizning rohi üchün mexsus Kur’ani kerim oquldi.

Arqidinla, < Dunya Uyghur Qurultiyi > ning mu’awin reyisi Esqerjan, < Sherqiy Türkistan informatsiyon merkizi > ning reyisi Abdujelil Qaraqash, < Yawropa Sherqiy Türkistan birliki > ning mu’awin reyisi Ablimit Tursun… qatarliqlar söz qilip, chetellerde yashawatqan barliq Sherqiy Türkistanliq qerindashlarni, Barin oghlanlirining weten – millet yolida eziz janlirini teqdim qilishtek pidakarliq rohidin ögünüp, ularning qehrimanliq ish – izlirini ewlatmu – ewlat dawam qildurup, chetellerde elip beriliwatqan milliy herikitimizning tereqqiyati üchün xalis töhpe qoshushqa chaqirdi.

Xatirilesh yighinida yene, Abdurehimjan we Perhat Yorungqashlar, 1990 – yili 4 – ayning 5 – küni yüz bergen Barin inqilawining meydangha kelish sewepliri, inqilapning jeryani we unung ichki – tashqi inkasliri heqqide tepsili melumat berip ötti.
Bu qétimqi pa’aliyetning 2 – basquchi mexsus söyümlük peyghembirimiz hezriti Muhammetning tughulghanliqining 1436 – yilliqini xatirileshke ayrildi.

< Dunya Uyghur qurultiyi > diniy ishlar kömutétining reyisi Turghunjan Alawudun Hajim we Qurultay ichki ishlar komutétining reyisi Abdujelil Emet Hajimlar, hezriti peyghembirimizning hayati we unung exlaq – peziletliri heqqide tepsili melumat berip ötkendin keyin, nöwette kommunist Xitay hakimiyitining Sherqiy Türkistan xelqighe qarita pütünley Dinsizlashturush siyasitini yolgha qoyup, yash ewlatlirimizni imanidin we milliy ghuroridin ayrishqa urunup keliwatqanliqini, shunga xelqimizning özlirini muqeddes islam eqidiliri bilen qorallandurup, Xitay mustemlikichilirining Uyghurlargha qaratqan atsimilatsiye qilip yoqutush siyasitige taqabil turushi lazimliqini alahide eskertip ötti.

Shu küni, yuqarqi xatirilesh pa’aliyitige mas halda, qurultay merkizi orginida tesis qilinghan < Alptekin Uyghur ösmürliri telim – terbiye merkizi > dimu Barin inqilabining 17 – yilliqi xatirilendi.

Shu küni oqutquchilar ikki sinipqa ayrilghan Uyghur ösmürlirige, 1990 – yili 4 – ayning 5 – küni yüz bergen Barin inqilabi heqqide tepsili melumat berip ötti we ösmürlirimiz teripidin Barin shehidlirimizning rohi üchün du’alar oquldi.

Bu qétimqi pa’aliyet heqqidiki neqmeydan körünüshi, 4 – ayning 5 – küni < Sherqiy Türkistan informatsiyon merkizi > teripidin tesis qilinghan < uygur – tv > de elan qilinidu.