< Yawropada Newruz > Sen’et Kéchiliki Tentenilik Ötküzüldi

< Dunya Uyghur Qurultiyi > qarmighidiki < Yawropa sherqiy türkistan birliki > teshkilati teripidin 3 – ayning 24 – küni Germaniyening München shehride ötküzülgen < Yawropada newruz > namliq sen’et kéchiliki misli körülmigen derijide intayin tentenilik we muwapiqiyetlik ötküzüldi.

Sen’et nomurlirining nepis we molluqi, kespiy sewiyesining yuqurliqi, teshkillesh hizmetlirining retlik we mukemmelliki, sehne mohiti we dekliratsiyening güzelliki, shundaqla nomur orundap chiqqan qiz – yigit we omaq ösmürlirimizning jushqunluqi bilen, bu qétimqi newruz sen’et kéchiliki pütün tamashibinlarning qelbini lerzige saldi.Germaniyediki Uyghur jama’iti, bu qétimqi newruz sen’et kéchilikige intayin yuquri baha bérishti we özlirige untulmas bir keche yashatqan < Yawropa sherqiy türkistan birliki > teshkilati rehberlik hey’itige bolghan minnetdarliqlirini izhar qilishti.

< Yawropada newruz > sen’et kéchiliki, shenbe sa’et 19 da Germaniyening München shehridiki < Kulturhaus Milbertshofen > namliq mediniyet merkizining körkem zalida resmiy bashlandi. Nechche yüz kishilik bu zal tamashibinlar bilen liq tolghan, München shehridiki Uyghurlardin sirt yene Germaniyening bashqa sheherliride yashawatqan Uyghurlarmu alahide bügünki newruz kéchilikige qatnishish üchün kelgen idi. Undin bashqa yene Amerikining Münchendiki Konsuli, Qazaqistanning Shiwitsiyediki konsuli, Germaniyediki xelqaraliq teshkilatlar we Türk – islam teshkilatlirining mesullirimu teklipke bina’en kélip tamashibinlar qataridin orun alghan idi.< Yawropada newruz > sen’et kéchiliki, Germaniye waqti sa’et del 19 da, < Yawropa sherqiy türkistan birliki > ning tebrik nutqi bilen resmiy bashlandi.

Germanche hazirlanghan tebrik nutqida, zaldiki chetellik dostlargha, Nowruzning alahidiki, shundaqla Uyghur xelqining mediniyet we sen’itining tereqqiyat tarixi, Kommunist Xitay hakimiyitining Uyghur xelqining mediniyet – sen’itige qaritip kéliwatqan yoqutush we atsimilatsiye qilish siyasetliri heqqide qisqiche melumat bérip ötüldi.

Arqidinla teklipke bina’en sehnige chiqqan < Dunya Uyghur Qurultiyi > ning bash meslihetchisi, ataghliq Uyghur siyasiyon we deplomat Erkin Alptekin ependi söz qilip, pütün Sherqiy türkistan xelqining bu en – eniwiy newruz bayrimini qutluqlaydighnliqini izhar qilish bilen birge, chetellerde yashawatqan Uyghurlarni özlirining en – eniwiy ör – adetlirige, milliy mediniyiti we sen’itige warisliq qilip we unu üzlüksiz tereqqi qildurup, inaq, ittipaq bolghan küchlük bir jama’et asasini berpa qilishqa we bu arqiliq Xitay hakimiyitining milliy ediniyitimizni yoqutush siyasitige ünümlük halda taqabil turushqa chaqirdi. rkin Alptekin ependining nutqidin kéyin newruz sen’et nomurliri resmi bashlandi.

Germaiyediki, shundaqla teklipke bina’en Norwigiye, Belgiye, Erlandiye, Gollandiye, Shiwitsiye qatarliq döwletlerdin kelgen talantliq sen’etkarlirimizning bir – biridin güzel we jushqun sen’et nomurliri oyun zalini lerzige sélip, pütün tamashibinlarni mes qildi.

Top – toghra 3 sa’et dawam qilghan < Yawropada newruz > sen’et kéchilikining birinchi resmiy bölümide jemi 20 ge yeqin nomur orundap chiqildi. Bu nomurlarda, baharning elchisi hisaplanghan newruzning xoshalliq ten – tenisi, weten – milletke bolghan söygü we seghinish, birlik we ittipaqliqqa bolghan telpünüsh, shehitlirimizge bolghan hörmet we sadaqet, yene shundaqla külke – chaqchaq, ghayghu – hesretlerning hemmisi zich mujessemleshken idi.


Sen’et nomurliri, nax’sha – usol, leper, muzika, épizot, nesir, shé’ir … qatarliq shekillerni öz ichige alghan bolup, talantliq sen’etchimiz Ablimit Tursun ependi teripidin qelemge élinip orundap chiqilghan epizotlarning terbiyewiy qimmiti we Xitap qilish küchi intayin yuquri idi, bolupmu Xitay hakimiyitining < 5 – fewral > ishtirakchilirigha yürgüzgen weh’shi qanxorluqi namayen qilinghan < Türmidin chiqqan xet > namliq epizot orundap chiqilghanda, pütün zalni toldurghan tamashibinlar hayajandin özlirini tutalmay buquldap yighlap kétishti.

Sen’et kéchilikining Jem’i 3 sa’et dawam qilghan resmiy bölümi ayaqlashqanda, pütün zaldiki tamashibinlar güldiras alqish yangritip, xéli uzunghiche sen’etchilirimizni tebrikleshti. Tamashibinlarning küchlük téliwige asasen, sehnining töwinide meydan hazirlinip, sen’et kéchilikining erkin pa’aliyet qismi bashlandi. Tamashibinlar jushqun muzika sadaliri ichide bes – bes bilen usolgha chüshüp, pütün zalni heqiyqi bir bayram keypiyatigha chömdürdi. Ikki sa’etke yeqin dawam qilghan 2 – bölümdimu sen’etkarlar yene hérip – charchighinigha qarimastin kötürenggü roh bilen Yumur, nax’sha – usol nomurlirini orundap chiqip, tamashibinlargha untulmas bir keche yashatti.

newruz sen’et kéchiliki ayaqlashqanda, bu qétimqi pa’aliyetni teshkilligen < Yawropa sherqiy türkistan birliki > ning reyisi, < Dunya Uyghur Qurultiyi > ning bash katibi Dolqun Eysa ependi söz qilip, Qurultay reyisi Rabiye Qadir xanimgha, Qurultaygha we < Yawropa Sherqiy Türkistan birlkige wakaliten, bu qétimqi sen’et kéchilikning intayin muwapiqiyetlik ötküzülishig ejir singdürgen we küch serip qilghan barliq qérindashlarha bir – birlep teshekkür bildürüp ötti.

Dolqun Eysa ependim öz sözide, ejdatlirimizning ewlatlargha misar qilip qaldurup ketken en'enewi milli bayrimimiz “newruz” ni tebriklesh, Yawropada Uyghurlarning milliy mediniyitini saqlap qélish, meniwiy hayatimizni shatlandurush, muhajirettiki miskin könglimizge teselli bérish meqsidide bundin bir qanche ay burun Germaniyede chong kölemlik “Yawupada newruz” sen'et kéchiligi ötküzüshni qarar qilghanliqini, shundin buyan teshkilat rehberliri we sen’etkarlarning zor derijide pidakarliq körsütishi, keche – kündüz japaliq meshiq qilishi, shundaqla Germaniyediki Uyghur jama’itiningmu qollap – quwetlishi netijiside bügünki bu sen’et kéchilikining nahayiti muwapiqiyetlik ötküzülgenlikini, bu arqiliq, Yawropadiki, jümlidin Germaniyediki Uyghur jama’itining birlik – barawerliki we öm – ittipaqliqining toluq namayen qilinghanliqini bayan qildi. Pa’aliyet axiride, Norwigiyedin alahide kélip yuquri maharet bilen Leper orundap chiqip, pütün tamashibinlarning qelbide texit qurghan omaq ösmürlirimiz Pirqet bilen Nadirelerge Germaniyediki Uyghur jama’iti namidin alahide sogha teqdim qilindi.

< Yawropa Sherqiy Türkistan Birliki > teshkilati rehberlik hey’iti, < Yawropada newruz > sen’et kéchilikining vidio filmini téz arida neshir qildurup, uni pütün dunyadiki Uyghurlargha tarqitip bérishke hazirlanmaqta.

Yawrupa Sherqiy Turkistan Birligi Teshwiqat Bölümi

2007-yili 3-ayning 25-kuni