Washingtonda Tunji Qétim Uyghur Ayallirini Démokratiye We Kishilik Hoquq Buyiche Terbiyilesh Yighini Échildi

2007.03.23  RFA

Amérika démokratiyini ilgiri sürüsh fondi jemiyiti, Amerikidiki Uyghur kishilik hoquq démokratiye fondi jemiyiti we dunya Uyghur qurultiyining uyushturushi bilen, Amerikining paytexti washingtonda "Uyghur ayallirini démokratiye we kishilik hoquq buyiche terbiyilesh" yighini ötküzüldi.

Tunji qétim élip bérilghan mezkür yighin, jüme küni chüshtin burun washington waqti saet 1 de bashlandi. Amérikidiki Uyghur kishilik hoquq, démokratiye fondi jemiyitining reisi Dr. Rishat Abbas yighingha riyasetchilik qilip, mezkür yighinning échilishidiki asasiy meqsidi, shuningdek yighinning échilishigha küch chiqarghan we yardem qilghan teshkilat we shexsler hemde yighingha qatnishish üchün dunyaning herqaysi jayliridin kelgen méhmanlarni tonushturup ötti.

Aldi bilen sözge teklip qilinghan, dunya Uyghur qurultiyining reisi Rabiye qadir xanim, yighin ehlining qizghin alqish sadaliri ichide sehnige chiqip, söz qildi.

Yighinda Amerika döletlik démokratiyini ilgiri sürüsh fondi jemiyiti programma ‏- pilan we bahalash ishlirigha mesul muawin reisi Barbara Haig xanim, Hudson inistituti diniy erkinlik merkizi mudiri Nina Shea xanim, Amerika dölet mejlisi kishilik hoquq guruppisi mudiri, Amerika dölet mejlisi xelqara munasiwet kométiti xadimi Hans Hogrefe ependi, xelqara kechürüm teshkilati Amerika shöbisi asiya bölümi mudiri T Kumar, Amerika démokratiyini ilgiri sürüsh fondi jemiyiti sherqiy asiya bölümi mudiri Lousia Coan Greve xanim, xelqara tibecht herikiti ijraiye mudiri Mary Larmore xanimlar ayrim ‏- ayrim söz qilip, Uyghurlarning démokratiye we kishilik hoquq mesilisi, diniy erkinlik mesilisi qatarliq nöwette Uyghurlar duch kéliwatqan bir qatar mesiller heqqide toxtilip, qandaq qilghanda Uyghurlarning kishilik hoquqini yaxshilighili bolidighanliqi we qandaq qilghanda Amerika we gherb elliriidiki kishilik hoquq teshkilatlirining himayisige érishishni qolgha keltürgili bolidighanliqi heqqide toxtaldi, shuningdek dunya jamaetchilikige Xitay hökümitining Uyghurlar üstidin élip bériwatqan zulumlirini delil, ispat - pakitlar bilen anglitishni teshebbüs qildi.