Poskamdin 280 Neper Uyghur Qiz Xitaygha Yolgha Sélindi

< Xinjiang geziti > ning xewer qilishiche, 3 – ayning 20 – küni Poskam nahiyesining Yima yézisidin yene 280 neper Uyghur déhqan qizi Ürümqidin poyez bilen Xitayning Tian Jin shehrige ishleshke yolgha sélinghan.

Yima yéziliq hökümet, Esqer Yimit isimlik yéza kadirini bu qizlarni bashlap bérishqa mesul qilghan.

Wetendin kelgen inkaslargha qarighanda, Xitayning ichki ölkilirige iwetilidighan 16 yashtin 20 yashqiche bolghan Uyghur qizlirini tizimlap chiqish wezipisi herqaysi yézilardiki milliy ottura – bashlanghuch mekteplerge yüklengen bolup, yéza mektepliridiki oqutquchilar ilgiri özlirining qolida oqughan we ali mekteplerge baralmay yézida déhqanchiliq qiliwatqan qizlarni tizimlap chiqip yéziliq hökümetke yollaydiken, yéziliq hökümetler bu tizimlikke qarap turup kimlerning baridighanliqini belgilep chiqidiken.

Déhqan ayililirining hemmisi digüdek öz qizlirining Xitaygha ishleshke bérishini xalimisimu, emma hökümet tarmaqlirining tehdit we jazaliridin qorqup na’ilaj iwetishke mejbur bolidiken.

Eger qizliri barghan yerliridin qechip kelse, ularning ayililirige barliq yol chiqimlirini töletkendin sirt, yene ulargha iqtisadi jehettin eghir jazalar bérilidiken.
.